ზვარის წმინდა გიორგის ეკლესია

ზვარის წმინდა გიორგის ეკლესია აჭარაში, ქედის მუნიციპალიტეტის სოფელ ზვარეში მდებარეობს. იგი ხელოვნურად შექმნილ სუბსტრუქციაზე დგას, მდინარისპირა კონცხზე. ნაგებობა დარბაზული ტიპისაა და აღმოსავლეთით ნახევარწრიული ფორმის შვერილი აფსიდით სრულდება. ეკლესიას დასავლეთით კარიბჭე აქვს მიშენებული, რომელიც სამი მხრით თაღებითაა გახსნილი. შესასვლელია ერთია, დასავლეთიდან. ტაძრის ყველა სარკმელი და შესასვლელიც თაღოვანია. ფასადებს სადა პროფილის მქონე ლავგარდანი შემოუყვება. გარდა ლავგარდნისა ფასადებზე არანაირი დეკორატიული ელემენტი არ გვხვდება. ეკლესიის დასავლეთით კვადრატული მოზახულობის სამსართულიანი სამრეკლო დგას, რომელიც კარიბჭის ფუნქციასაც ასრულებს. სამრეკლოს პირვალი სართული სამ მხარეს თაღითაა გახსნილი, სამხრეთით კი ხელოვნურ ბაქანს ებჯინება, მეორე სართული ყრუა და სარკმლებით ნათდება, მესამე სართული კი წრიული ფორმის, გუმბათისებურ სამრეკლოს წარმოადგენს რვა თაღოვანი სარკმლით. ტაძარი და სამრეკლოს პირველი ორი სართული ნაგებია უხეშად თლილი ქვით, სამრეკლოს მესამე სართული კი - რიყის ქვით.