ფერსა - ტაბაკინი

რას ვნახავთ?

ეს მარშრუტი არის მათთვის, ვისაც ნამდვილი თავგადასავალი სწყურია და სურს საკუთარი ძალები გამოსცადოს. თუ საკუთარი თავის იმედი გაქვთ ეს მარშრუტი სწორედ თქვენთვისაა. მარშრუტი გაივლის სოფელ ფერსაში, ხანში, საკრაულასა და ტაბაკინში. აქ შეხვდებით მესხეთისა და იმერეთის ბუნების მშვენიერებებს, ნისლში გახვეულ ალპურ მდელოებს, სტუმართმოყვარე მწყემსებს, რომლებიც სიამოვნებით გაგიმასპინძლდებიან, თვალუწვდენელ ხეობებს, იხილავთ ხედებს დასავლეთ და სამხრეთ საქართველოზე, თუ ამინდში გაგიმართლებთ კავკასიონის მწვერვალიბიც მიიპყრობენ თქვენს ყურადღბას. ეს მარშრუტი ძალიან ცოტამ თუ იცის, აქედან გამომდინარე აქ მოგზაურობა იქნება ახალი გამოცდილება და უცნობი ადგილების მონახულების შესაძლებლობა. გაივლით მესხეთის ქედის უცნობ და ულამაზეს ადგილებს, მათ შორის, მარშრუტის ნაწილი გადის ბორჯომ-ხარაგაულის ეროვნული პარკის ტერიტორიაზე, თუმცა ამ ადგილებში მწყემსების გარდა არავინ დადის. მარშრუტზე შეგხვდებათ ულამაზესი საბანაკე ადგილები და არც უწყლობა შეგაწუხებთ.

ძირითადი ტექნიკური ინფორმაცია:

მარშრუტის მთლიანი გასავლელი მანძილი შეადგენს 73 კილომეტრს, რომლის დასაფარადაც დაგჭირდებათ 4 დღე. მარშრუტის განმავლობაში გიწევთ ასწიოთ 1470 მეტრი და დაეშვათ 2170 მეტრი, ხოლო უმაღლესი წერტილი, რომელსაც მიაღწევთ მარშრუტის განმავლობაში მდებარეობს მესხეთის ქედზე, 2470 მეტრზე ზღვის დონიდან. მარშრუტი იწყება ახალციხის მუნიციპალიტეტის სოფელ ფერსადან, ადის მესხეთის ქედზე, მოკლე მონაკვეთში მიუყვება ქედს და შემდეგ ეშვება სოფელ ხანში. სოფელ ხანიდან მთა კინკილეთის მიმდებარედ გადადის სოფელ საკრაულაში, ხოლო შემდეგ წვერი-ალხაპირის ქედის გადაკვეთით ჩადის სოფელ ტაბაკინში.

სირთულე: საშუალო

მარშრუტის განმავლობაში გიწევთ 7-8 საათი სიარული დღში, გარდა მეოთხე დღისა, როცა მანძილს 3-4 საათში დაფარავთ. მარშრუტი ძირითადად მიუყვება გრუნტოვან გზას, თუმცა გვხვდება კლდოვანი და მაღალ ბალახიანი მონაკვეთებიც. ბილიკი გაივლის როგორც ტყიან, ისე ალპურ ზონებს.

საბანაკე ადგილები:

მარშრუტზე გვხვდება მეტად კარგი საბანაკე ადგილები. პირველ და მეორე ღამეს შეგიძლიათ დაბანაკდეთ მწყემსის ქოხში, ან სასურველ ადგილას გაშალოთ კარავი. პირველ დღეს დასაბანაკებელი მწყემსის ქოხი მდებარეობს მთა ციხისძირის სამხრეთით, მდინარე ბარათხევის სათავესთან. საბანაკის გარშემო არის ტყე და შეშის მოგროვება პრობლემას არ წარმოადგენს. წყალიც შეგიძლიათ იქვე შეავსოთ, მწყემსის ქოხებთან დაგხვდებათ წყარო, ცოტა მოშორებით კი პატარა ხევი. მეორე დღეს დასაბანაკებელი ადგილი ასევე მწყემსის ქოხია, რომელიც მდებარეობს სოფელ ხანიდან სამხრეთით 6 კილომეტრში, ტყიან ზონაში. იქვე არის წყარო, ასევე შეძლებთ შეშის მოგროვებასაც. მესამე დღეს დასაბანაკებელი ადგილი არის სოფელი საკრაულა, სადაც შეავსებთ წყალს, დაანთებთ კოცონს და დაისვენებთ.

რეკომენდაციები:

მარშრუტზე დაგჭირდებათ კარგი სალაშქრო ფეხსაცმელები, სალაშქრო ჯოხები, ზურგჩანთა, თბილი საძილე ტომარა და თბილი მოსაცმელი, საგებელი, კარავი, გამოსაცვლელი ტანსაცმელი, წყალი 1-1.5 ლიტრი, შესაძლებელია გზაზე შევსებაც, მზის სათვალე და მზისგან დამცავი საშუალებები, რადგან მოგიწევთ სიარული ალპურ ზონაში, ასევე ფანარი, პირადი აფთიაქი. თან უნდა იქონიოთ 4 დღის სამყოფი საკვები. ამასთან, სასურველია მწყემსის სადგომებთან მიახლოებისას აცნობოთ მესაქონლეებს თქვენი გამოჩენის შესახებ, რათა თავიდან აირიდოთ ძაღლებთან უსიამოვნება.