ფულის მუზეუმი

ფულის მუზეუმი კახეთში, ქალაქ ყვარელში მდებარეობს, რუსთაველის ქუჩის 10 ნომერში. იგი 2001 წელს დაარსდა 1981-1989 წლებში მოქმედი „ბანკის მუზეუმის“ ბაზაზე. ფულს უძველესი დროიდან იყენებენ, მისი ისტორია და მნიშვნელობა ქვეყნის ეკონომიკაში თუ განვითარებაში ძალიან საინტერესოა. ფულის მუზეუმი საქართველოში ერთადერთია, რომელიც მთლიანად მხოლოდ ფულს ეძღვნება. აქ წარმოდგენილია საქართველოში ფულის მიმოქცევის მრავალსაუკუნოვანი ისტორია ძველი წელთაღრიცხვის VI საუკუნიდან დღემდე და ასევე თანამედროვე მსოფლიოს სხვადასხვა ქვეყნის ვალუტა. მუზეუმი განსაკუთრებით მიმზიდველი ნუმიზმატიკით დაინტერესებულთათვის იქნება. ფულის მუზეუმში, გარდა მრავალფეროვანი ექსპოზიციის დათვალიერებისა, შეგიძლიათ შეიძინოთ ისტორიული ქართული მონეტების ასლები, პუბლიკაციები ფულის ისტორიის თემაზე და ა.შ.