გეგის ჩანჩქერი

გეგის ჩანჩქერი აფხაზეთში, გაგრის მუნიციპალიტეტში მდებარეობს, მდინარე ბზიფის მარჯვენა შენაკადზე - გეგაზე, ზღვის დონიდან დაახლოებით 530 მეტრზე. აფხაზეთის ტერიტორია დღესდღეობით ოკუპირებულია რუსეთის მიერ. ჩანჩქერის სიმაღლე 70 მეტრია. მდინარე გეგა ერთ-ერთ მონაკვეთში კარსტულ ნაპრალში ხვდება, მიწისქვეშა დერეფნების გავლის შემდეგ კი კლდის შუაგულიდან გადმოედინება და საოცრად შთამბეჭდავ სანახაობას ქმნის. კლდის ნაპრალიდან გადმოშვებული გეგის ჩანჩქერი ეგზოტიკურობითა და სილამაზით მრავალ ბუნებისა და მოგზაურობის მოყვარულს იზიდავს. ჩანჩქერის წყალი ძალიან ცივია და მიმდებარე ტერიტორიაზე თითქმის ზაფხულის ბოლომდე ნახავთ თოვლს. გეგის ჩანჩქერთან ახლოს მდებარეობს გეგის მღვიმე, სადაც გვხვდება ულამაზესი ნაღვენთი ფორმები - სტალაქტიტები, სტალაგმიტები, კარსტული სვეტები, ფარდები, ტრავერტინის სქელი ნაფენები და სხვა. გეგის ჩანჩქერთან მისვლა მანქანითაც არის შესაძლებელი, ამიტომაც მისი ნახვა ნებიემიერ მსურველს მარტივად შეუძლია.