ღვთისმშობლის შობის სახელობის საკათედრო ტაძარი

ღვთისმშობლის შობის სახელობის საკათედრო ტაძარი - ქართული მართლმადიდებლური ტაძარი ქალაქ ბათუმში, აჭარაში. იგი წარმოადგენს ეროვნული მნიშვნელობის კულტურული მემკვიდრეობის ძეგლს. მე-20 საუკუნის დასაწყისში აშენებულ ტაძარს როგორც არქიტექტურული, ასევე მხავრული ღირებულებაც აქვს.

ისტორია

ღვთისმშობლის შობის სახელობის საკათედრო ტაძარი აშენდა 1897 წელს, მეცენატი ძმები ზუბალაშვილების მიერ. შენობა ნეო-გოთური სტილითაა აგებული და სამგუმბათიანია. საბჭოთა პერიოდში აქ განთავსებული იყო არქივი, შემდეგ მაღალი ძაბვის ლაბორატორია. მოგვიანებით, აჭარის მთავრობის გადაწყვეტილებით შენობა გადაეცა ქართულ მართლმადიდებულ ეკლესიას. 1989 წელს ტაძარი აკურთხა სრულიად საქართველოს კათოლიკოს პატრიარქმა ილია II-მ. ამ დღეს ჩატარდა საზეიმო ნათლობა, სადაც 5000-მდე ადამიანი ეზიარა ქრისტეს ჭეშმარიტ სარწმუნოებას. ტაძრის წინამძღვრად დაინიშნა მღვდელი დავით შიოლაშვილი. რომელიც ამ ღირშესანიშნავ დღეს სრულიად საქართველოს კათოლიკოს-პატრიარქის ილია II-ის ლოცვა-კურთხევით აღყვანილ იქნა დეკანოზის ხარისხში. ბათუმის ღვთისმშობლის შობის სახელობის ტაძარი იწოდა საკათედრო ტაძრად.დღეს ბათუმის ღვთისმშობლის ეკლესია ბათუმისა და ლაზეთის ეპარქიის მთავარი საკათედრო ტაძარია.