ბათუმი

ბათუმი დასავლეთ საქართველოში, აჭარაში მდებარეობს. იგი ულამაზესი ზღვისპირა ქალაქია მოელვარე სანაპიროებითა და მომხიბვლელი გარემოთი. ბათუმის ტერიტორია ჯერ კიდევ ბრინჯაოს ხანაში იყო დასახლებული. აქ ცხოვრება დუღდა ანტიკურ ხანაშიც და მოსახლეობას სავაჭრო კავშირები ჰქონდა მეზობელ და შორეულ ქვეყნებთან. უძველესი ისტორია, მსუბუქი და დინამიური არქიტექტურა, მზიანი სანაპირო, ბულვარი, ბათუმის ბოტანიკური ბაღი, უგემრიელესი აჭარული სამზარეულო და მრავალი გასართობი, კულტურული თუ დასასვენებელი ადგილი შეუდარებელს ხდის ამ ქალაქს და უამრავ დამსვენებელსაც იზიდავს. ის პოპულარობით სარგებლობს არა მარტო რესპუბლიკის, არამედ რეგიონის მასშტაბითაც.

გეოგრაფია და კლიმატი

ქალაქ ბათუმის მუნიციპალიტეტი აჭარის ავტონომიური რესპუბლიკის ადმინისტრაციული ცენტრია. იგი შედგება ძველი ბათუმის, რუსთაველის, ბაგრატიონის, აღმაშენებლის, ჯავახიშვილის, თამარის, ხიმშიაშვილის, ბონი-გოროდოკის, აეროპორტის, კახაბრის, ბათუმის, გონიო-კვარიათის და მწვანე კონცხის ადმინისტრაციული ერთეულებისაგან. ქალაქის ძირითადი ნაწილი სამხრეთიდან ეკვრის ბათუმის ყურეს და კახაბრის ვაკის ჩრდილოეთ მონაკვეთზე მდებარეობს, დანარჩენი ნაწილი ყურის აღმოსავლეთით და ჩრდილო-აღმოსავლეთით — მდინარეების ბარცხანისა და ყოროლისწყლის გასწვრივაა გაშენებული. ბათუმი მსხვილი საერთაშორისო ნავსადგურია შავი ზღვის სამხრეთ-აღმოსავლეთ სანაპიროზე. მუნიციპალიტეტის ტერიტორიაზე გვხვდება ბუნებრივი ტბა, რომელიც ბათუმის პარკის ნაწილია. ქალაქსა და მის შემოგარენში სუბტროპიკული მცენარეულობაა გავრცელებული. ხშირია ხელოვნურად გაშენებული პარკები და ჩაისა და ციტრუსის პლანტაციები. გორაკ-ბორცვებზე კი ალაგ-ალაგ შემორჩენილია კოლხური ბუნებრივი ტყე და ბუჩქნარი.
ბათუმში ზღვის ნოტიო სუბტროპიკული ჰავაა უთოვლო ზამთრითა და თბილი ზაფხულით. იანვარში საშუალო წლიური ტემპერატურაა 7,1 °C, აგვისტოში კი — 23,2 °C.

რა ვნახოთ

ბათუმის დათვალიერება პირველ რიგში მის ქუჩებში გასეირნებით და XIX- XX საუკუნეების არქიტექტურის დათვალიერებით უნდა დაიწყოთ. ამ ქალაქში ასევე შეძლებთ ყველა მთავარი რელიგიური მიმდინარეობის (მართლმადიდებლობა, კათოლიციზმი, ისლამი, იუდაიზმი) საკულტო ნაგებობების მონახულებას. ბათუმისა და ზოგადად აჭარის ტერიტორიის უძველესი ისტორიიდან გამომდინარე, ძალიან საინტერესოა ბათუმის არქეოლოგიური მუზეუმი, სადაც უნიკალური მასალაა (ქართული და უცხოური წარმომავლობის მონეტები, ბრინჯაოს, მინისა და კერამიკის ჭურჭელი და სხვა) წარმოდგენილი ბრინჯაოს ხანიდან ახ. წ. შუასაუკუნეების ჩათვლით. ეს მზიანი, ზღვისპირა ქალაქი რა თქმა უნდა წარმოუდგენელია ბულვარის, შადრევნების, თანამედროვე არქიტექტურის, იახტებისა და მზის ჩასვლის პეიზაჟის გარეშე. საბოლოოდ კი ამწვანებული წალკოტი - ბათუმის ბოტანიკური ბაღი, მრავალფეროვანი მცენარეულობითა და ულამაზესი ხედებით, ნამდვილად მოგგვრით სიმშვიდესა და აღტაცებას.

ღირსშესანიშნაობები

• ბათუმის ბოტანიკური ბაღი
• ბათუმის არქეოლოგიური მუზეუმი
• აჭარის ხელოვნების სახელმწიფო მუზეუმი
• აჭარის ხარიტონ ახვლედიანის სახელობის მუზეუმი
• ბათუმის ბულვარი
• ნურის ტბა
• ბათუმის საზღვაო ნავსადგური
• მოცეკვავე შადრევანი
• ბათუმის დელფინარიუმი
• ბათუმის პანორამული ბორბალი
• მოძრავი სკულპტურა - ალი და ნინო
• ღვთისმშობლის შობის სახელობის საკათედრო ტაძარი
  
• წმ. ნიკოლოზის სახელობის ტაძარი
• ბათუმის სამების ტაძარი
• სინაგოგა
• კათოლიკური ეკლესია

ყველა ადგილის სანახავად დააჭირეთ აქ