გომარეთის პლატოს ხედები

გომარეთის პლატო, ზურტაკეტის პლატო წარმოადგენს ვულკანურ პლატოს სამხრეთ საქართველოს ზეგნის აღმოსავლეთ პერიფერიაზე, მდინარე შავწყაროსწყლის (ხრამის მარჯვენა შენაკადი) აუზში. დასავლეთით ესაზღვრება ჯავახეთის ქედი, ჩრდილოეთით - კვირიკეთის ქედი, აღმოსავლეთით - ხრამის ხეობა, სამხრეთით - ლუკუნის მასივი. სიმაღლე 1200-1600 მ. დასერილია მდინარე შავწყაროსწყლისა და მისი შენაკადების კანიონებით და ხეობებით, რომელთა სიღრმეა 10-500 მ. ფერდობებზე გამოქვაბულებია. პლატოს ზედაპირი უტყეოა, ათვისებულია სასოფლო-სამეურნეო კულტურებისათვის.

გომარეთის პლატოს ულამაზე ხედები იშლება თეთრიწყაროს მუნიციპალიტეტიდან, ნასოფლარების ახკალაფასა და წყნარის აბანოს შორის მოქცეული სამანქანო გზიდან, რომელიც სერს გადაივლის და პირდაპირ გაჰყურებს გომარეთის პლატოს, საიდანაც იშლება ულამაზე ხედები. გზა მიდის თეთრიწყაროს მუნიციპალიტეტის სოფლებიდან ალექსეევკა და ნავთიანი, სადაც ზემო ახკალაფაში მარჯვენა მხარეს გადაუხვევთ წყნარი აბანოსკენ და ახვალთ შემაღლებაზე საიდანაც ულამაზესი ხედები იშლება, იქვე შეგიძლიათ იხილოთ ქვემო ახკალაფას ღვთისმშობლის ეკლესია, ცხნარის ეკლესია და ცხნარის ციხე. უმჯობესია მაღალი გამავლობის ავტომობილითა და ფეხით შერეული მარშუტი, ან ფეხით რამდენიმე დღიანი, ტერიტორიის დიდი ნაწილი დაუსახლებელია ამიტომ სასურველია გვიანი გაზაფხულიდან ადრე შემოდგომამდე პერიოდი. სასმელი წყალი მხოლოდ ზემო ახკალაფაში "ელიჩკას" წყაროზე ვნახეთ.