გორულის ნაქალაქარის წმინდა ნინოს ეკლესია

გორულის ნაქალაქარის წმინდა ნინოს ეკლესია მდებარეობს ქვემო ქართლის მხარეში, მარნეულის მუნიციპალიტეტის სოფელ წერაქვის მიმდებარედ.

ნაქალაქარი შედგება რამდენიმე ნაგებობისგან მათ შორის, კოშკის, ქარვასლის, აბანოს, წმ. ნიკოლოზის, წმ. ნინოს და ხევის ეკლესიებისგან. ეკლესიები და კოშკი ერთმანეთისგან დაშორებულია და ყველა მათგანთან დიდი ნამოსახლის ნაშთები გვხვდება. გორულის ნაქალაქარის შენობები თავისი არქიტექტურული სტილიდან გამომდინარე XVII საუკუნით თარიღდება. დათარიღებას ხელი შეუწყო ასევე წმ. ნიკოლოზის ეკლესიის სააღმშენებლო წარწერამ.

გორულის კოშკიდან სამხრეთ-დასავლეთით, მის მოპირდაპირედ, შემაღლებულ გორაზე წმ. ნინოს ეკლესიაა აგებული. ერთნავიანი ნაგებობა (10,5x6,5 მ.), რომელსაც ჩრილოეთიდან მცირე ზომის ეკვდერი აქვს მიშენებული, სხვადასხვა ზომის ნატეხი და ყორექვითაა ნაგები. წყობა ქაოსურია. შესასვლელი კარი აღმოსავლეთის მხრიდანაა გაჭრილი. კარის თავზე დადგმულია დიდი ზომის, თაღოვან ფორმად გამოყვანილი არქიტრავის ქვა. ეკლესია თარიღდება XVII საუკუნით.