იდლეთის იოანე ნათლისმცემლის ეკლესია

იდლეთის იოანე ნათლსმცემლის ეკლესია მდებარეობს აღმოსავლეთ საქართველოში, შიდა ქართლში, კასპის მუნიციპალიტეტში, სოფ. იდლეთში (წინარეხის თემი).

ტაძარი თარიღდება VI ს. I ნახევრით. ეკლესია ჯვარ-გუმბათოვანია (7.5X7 მ), ნაგებია ქვიშაქვის დიდი ლოდებით, ნაგებობის გეგმა თანაბარმკლავიან ჯვარს წარმოადგენს, შესასვლელი დასავლეთიდანაა. ეკლესია შიგნით შელესილი და მოხატული ყოფილა. შემორჩენილია შელესილობისა და XII საუკუნის მხატვრობის ძლიერ დაზიანებული ფრაგმენტები. გუმბათში გაირჩევა ამაღლების კომპოზიცია თორმეტი მოციქულით.

დასავლეთის მხრიდან მოგვიანებით მიუშენებიათ სათავსო - ე.წ. „საქალებო“. საქალებოს მიშენების დროს ტაძარს ჩაუტარდა რესტავრაცია და მას ლავგარდანი შემოაყოლეს.

იდლეთის ნათლისმცემლის ძირითად თავისებურებას წარმოადგენს ოთხკუთხა დაბალი გუმბათი, რაც გამონაკლისია ფეოდალური ხანის ქართულ არქიტექტურაში. აღსანიშნავია ისიც, რომ ეკლესიას ერთადერთი კარი აქვს დასავლეთ მხარეს.