იხინჭას მარიამწმინდა

მარიამწმინდის ეკლესიის კომპლექსი მდებარეობს მცხეთა-მთიანეთის მხარეში, თიანეთის მუნიციპალიტეტში, ნასოფლარ იხინჭას მახლობლად, ტყით დაფარულ ბორცვზე. კომპლექსში შედის წმინდა მარიამის ეკლესია, ორსართულიანი ეკლესია, გალავანი და გალავანზე გარედან მიშენებული ორსართულიანი სამრეკლო. მათგან უადრესია ორსართულიანი ეკლესია, მომდევნო ხანებში აუგიათ დარბაზული ეკლესია და გალავანი, ხოლო სულ ბოლოს კი სამრეკლო.

კომპლექსამდე სამანქანო გზა არ მიდის, ის მთავრდება სოფელ გოჯიაანების მიმდებარეს სასაფლაოზე, ხოლო შემდეგ გზა უნდა განაგრძოთ ფერდზე და ახვიდეთ ტყეში სადაც კომპლექსი დაახლოებით 150-200 მეტრშია.