კალოთის ეკლესია

კალოთის ეკლესია აჭარაში, ხულოს მუნიციპალიტეტის სოფელ კალოთაში მდებარეობს. იგი XI-XIII საუკუნეების ძეგლია. ნაგებობა ნანგრევების სახითაა შემორჩენილი, შედარებით უკეთაა შემორჩენილი ტაძრის აღმოსავლეთი მხარე, საკურთხევლის აფსიდის კედელი და კონქის ნაწილი, დანარჩენი კი საძირკვლის დონემდეა დაცული. ეკლესია დარბაზულ ნაგებობას წარმოადგენს სამხრეთის მინაშენით, რომელიც საძვალედ იყო გამოყენებული. დარბაზი აღმოსავლეთით ნახევარწრიული აფსიდით სრულდება. საკურთხეველი დარბაზის იატაკთან შედარებით ერთი საფეხურითაა ამაღლებული. როგორც ჩანს, ნაგებობის კამაროვანი გადახურვა საკმაოდ სქელ კედლებსა და შვერილ, პროფილირებულ პილასტრებზე გადაყვანილ ერთადერთ საბჯენ თაღს ეყრდნობოდა. აფსიდში ერთი სარკმელია გაჭრილი. შესასვლელი ერთია - სამხრეთიდან. ტაძრის ტერიტორიაზე აღმოჩნდა ორნამენტირებული ქვების და ლავგარდნის ფრაგმენტები, მათ შორის ქვის ფილა ქართული ასომთავრული წარწერით. კალოთის ეკლესიის კედლები მოპირკეთებული ყოფილა კარგად დამუშავებული ქვის ფილებით და შემკული იყო ჩუქურთმებით.