კარდენახის წმ. ნიკოლოზის ეკლესია

კარდენახის წმ. ნიკოლოზის ეკლესია მდებარეობს კახეთში, გურჯაანის მუნიციპალიტეტის სოფელ კარდენახის ტერიტორიაზე.

აგებულია VI საუკუნის შუა ხანებში. შენობა ნაგებია კარგად შერჩეული რიყის ქვის თანაბარი რიგებით. ეკლესიაში შესასვლელი სამხრეთიდანაა, სამმალიანი თაღედის სახით. შენობის გეგმის გარეგან სწორკუთხედში (11.2 მ * 10.5 მ-ზე) ჩაწერილია სამი ნავი, რომლებიც დამოუკიდებელ ეკლესიებს წარმოადგენენ. დასავლეთით, მთავარი ეკლესიის გაყოლებაზე, კარიბჯეა, რომელიც თითო კარით უკავშირდება მთავარ და სამხრეთ ეკლესიებს და ჩრდილოეთ ნავის დასავლეთ ბოლოში მოწყობილ პატარა კვადრატულ სათავსს. კარიბჭის თავზე მოწყობილია პატრონიკე, რომელსაც დამოუკიდებელი კამარა ხურავს და მთავარ ეკლესიაში მთელ სიგანეზეა გახსნილი.

1974 - 1976 წლებში ეკლესიას ჩაუტარდა სარესტავრაციო - საკონსერვაციო სამუშაოები. ეკლესია გაიწმინდა მიწაყრილისაგან, რომელიც 2 მ-ზე მეტ სიმაღლეზე ფარავდა ფასადებს. აღდგა კედლების მნიშვნელოვანი ნაწილი, ნაწილს კი ჩაუტარდა კონსერვაცია. სამხრეთ ეკლესია და პატრონიკე გადაიხურა ღარისებრი კრამიტით.

ეკლესიას 2011 წელს ჩაუტარდა სარესტავრაციო სამუშაოები და სრულად აღდგა ჩამონგრეული სახურავი და კამარები.