კიანეთის ღვთისმშობლის ეკლესია

კიანეთის ”ღვთისმშობლის” ეკლესია მდებარეობს ქვემო ქართლში, ბოლნისის მუნიციპალიტეტის სოფელ კიანეთის ტერიტორიაზე.

”ღვთისმშობლის” ეკლესია დგას სოფლის დასავლეთ ნაწილში. ნაგებია სხვადასხვა ზომის ნაწილობრივ დამუშავებული ქვით. აგებულია ერთსაფეხურიან მაღალ ცოკოლზე, რომლის ქვედა ორი რიგი კლდის ქვითაა გაკეთებული, მესამე, ზედა ფენა კი ყვითელი ფერის ქვით. შესასვლელი სამხრეთ კედელშია. გარედან არქიტრავულია, შიგნიდან შეისრულთაღოვანი. არქიტრავის შუაში პალმეტურ ჩარჩოში ჩასმული ბოლნური მედალიონია გამოსახული. აღმოსავლეთის და დასავლეთის კედლებში თითო სწორკუთხა, ხოლო სამხრეთის კედელში ორი ასეთივე სარკმელია. ოთხივე ამოქოლილია ამჟამად. ნახევარწრიული აფსიდა მხრითაა გამოყოფილი, რომლის პროფილირებულ კაპიტელებზე კონქის საბჯენი თაღი იყო გადაყვანილი. გრძივი კედლების შუაში ცერადკვეთილ და რელიეფით გაფორმებულ კონსოლებზე შეკიდული თითო წყვილი პილასტრია, რომელიც დასრულებულია პროფილირებული კაპიტელებით. კაპიტელებზე კამარის საბჯენი თაღი გადადიოდა. იმპოსტებს ეყრდნობოდა ასეთივე საბჯენი თაღი გრძივი კედლების დასავლეთ კუთხეებში. ჩრდილოეთის შეკიდულ პილასტრზე ოთხსტრიქონიანი ქართული ასომთავრული წარწერაა ამოკვეთილი. კამარა და კონქი არ შემორჩა.

ტაძარი ყველა მახასიათებლით უნდა განეკუთვნებოდეს X საუკუნეს. ამგვარად დათარიღების შესაძლებლობას გვაძლევს ჩრდილოეთით შემორჩენილი თაღის ქუსლის ქვაზე შემორჩენილი ოთხსტრიქონიანი ასომთავრული წარწერა: ,,აიგო წ(მიდ)ა ესე ეკლესია ჴელითა მიქაელ ეპისკოპოზისა თა“.