ქორეთის მაცხოვრის ეკლესია

ქორეთის მაცხოვრის ეკლესია იმერეთის მხარეში, საჩხერის მუნიციპალიტეტში მდებარეობს, სოფელ ქორეთში. იგი X საუკუნით თარიღდება. ეკლესია დარბაზულ ნაგებობას წარმოადგენს, სამხრეთიდან და დასავლეთიდან მინაშენებით. ნაგებობას აღმოსავლეთით სწორკუთხა აბსიდი აქვს, რომლის კედლების გადასვლა კონქის სიმრგვალეში კუთხეებში მოწყობილი თითო, ოდნავ მორკალული თაღით ხორციელდება. დარბაზის კამარა და საკურთხევლის კონქი პილასტრებზე გადაყვანილ თაღებს ეყრდნობა. საკურთხევლის იატაკი და სოლეა ერთი საფეხურითაა შემაღლებული და დარბაზში ღრმად არის შემოჭრილი. ნაგებობას სამხრეთის კარის წინ სამმხრივ თაღებით გახსნილი კარიბჭე აქვს მიშენებული, მდიდრულად მორთული გუმბათით. ეკლესიას ორი თაღოვანი კარი აქვს - დასავლეთითა და სამხრეთით. თაღოვანია ტაძრის სარკმლებიც. ქორეთის მაცხოვრის ეკლესია გამოირჩევა მაღალმხატვრული, დახვეწილი დეკორით. ჩუქურთმები ღრმა კვეთითაა შესრულებული. ეკლესია მდიდარია ლაპიდარული წარწერით. სამხრეთის შესასვლელის ბარიერის წარწერით ირკვევა, რომ ეკლესია 1000 წელსაა აგებული. ინტერიერი მოხატულია, გვხვდება ფრესკული წარწერებიც.