კრუბერის მღვიმე

კრუბერის მღვიმე აფხაზეთში, გაგრის მუნიციპალიტეტში, ბერჭილის ქედზე მდებარეობს. აფხაზეთის ტერიტორია ამჟამად ოკუპირებულია რუსეთის მიერ. კრუბერის უფსკრული სიღრმით მსოფლიოში მეორე ადგილზეა ვერიოვკინის მღვიმის შემდეგ, რომელიც ასევე აფხაზეთში მდებარეობს. მღვიმე 1960 წელს აღმოაჩინეს, სახელი კი ცნობილი რუსი გეოგრაფის ალექსანდრე კრუბერის პატივსაცემად უწოდეს, რომელიც დასავლეთ კავკასიონის მთებს იკვლევდა მეოცე საუკუნის დასაწყისში. კრუბერის მღვიმე საოცრად შთამბეჭდავ და მისტიკურ სანახაობას წარმოადგენს. ვერტიკალური, ძალიან ღრმა, ჭისებრი ჩასასვლელით მღვიმის ჯადოსნურ სამყაროში მოხვედრა მხოლოდ სპეციალური აღჭურვილობის საშუალებითაა შესაძლებელი. მღვიმის შესასვლელი ზღვის დონიდან 2320 მეტრზეა. კრუბერის გამოქვაბული სუბვერტიკალური ტიპის სიღრუეს წარმოადგენს. მღვიმეში გვხვდება მინიატურული სტალაქტიტები, სტალაგმიტები და ფარდები. ქვაბულში არის წყლის ნაკადები და პატარა ტბები. კრუბერის უფსკრულის წყლებით საზრდოობს მდინარე რეპრუა.