ქვემო არქევანის ეკლესია

ქვემო არქევანის დარბაზული ეკლესია მდებარეობს ქვემო ქართლის მხარეში, ბოლნისის მუნიციპალიტეტის ტერიტორიაზე.

ეკლესიას სამხრეთის აქვს თანადროული მინაშენი. ნაგებია კარგად ნათალი ყვითელი ტუფის კვადრებით. დგას ერთსაფეხურიან ცოკოლზე. გარედან არქიტრავული და შიგნიდან თაღოვანი შესასვლელი დასავლეთიდან აქვს. დარბაზი განათებულია სამხრეთის, დასავლეთისა და აღმოსავლეთის ვიწრო და თაღოვანი სარკმლებით. კედლები დასრულებულია წრეთარგის ფორმის მქონე ლავგარდნით. განახლების შემდეგ დახურულია თუნუქით. ნახევარწრიული აფსიდა მხრითაა გამოყოფილი. აფსიდის ჩრდ. კედლში თაღოვანი ნიშია. კონქი პროფილირებულ იმპოსტებზე გადაყვანილ ტრიუმფალურ თაღს უჭირავს. ასეთივე პროფილირებულ იმპოსტებზეა შეკიდული კამარის საბჯენი თაღიც. ხოლო გრძივი კედლების დას. კიდეში მძლავრი ასეთივე იმპოსტებით დასრულებული ნახევარპილასტრია. საკურთხევლის იატაკი ერთი საფეხურითაა შემაღლებული. იატაკი აღდგენის შემდეგ ქვის ფილაფენილია. ტაძრის ფასადების მორთულობა მწირია და მხოლოდ სარკმელთა გაფორმებით შემოიფარგლება: აღმოსავლეთის სარკმელს ბოლოებგანზიდული წყვილი ლილვით შედგენილი წარბი აქვს, ხოლო დასავლეთის სარკმელს სადა ლილვებით მოჩარჩოებული საპირე, რომლის თაღზეც ჯვარია აზიდული.