ქვიშხეთი

კურორტი ქვიშხეთი შიდა ქართლის მხარეში, ხაშურის მუნიციპალიტეტში მდებარეობს, ლიხის ქედის აღმოსავლეთ კალთზე, ზღვის დონიდან 750 მეტრზე. მიუხედავად იმისა, რომ ქვიშხეთი ხაშურის მუნიციპალიტეტს ექვემდებარება, იგი ბორჯომის ჯგუფის კურორტად მოიხსენიება. ეს ადგილი ჰავის უნიკალური სამკურნალო თვისებებით ხასიათდება, რასაც შავი ზღვიდან წამოსული თბილი ნოტიო ჰაერის მასებისა და მთის ჰავის შერწყმა განაპირობებს. კურორტის ტერიტორიაზე მოედინება სამკურნალო თვისებების მქონე მინერალური წყლები. ქვიშხეთი განსაკუთრებით სასარგებლოა ბავშვებისთვის, რომლებსაც სასუნთქი გზების დაავადებები აწუხებთ. წიწვოვანი და შერეული ტყეები, მთები და ლამაზი ხედები შესანიშნავ გარემოს ქმნის დასასვენებლად. ქვიშხეთში დაბალი მთის სუბტროპიკული ჰავაა, ზომიერად ცივი, მცირეთოვლიანი ზამთრითა და თბილი ზაფხულით. იანვრის საშუალო ტემპერატურაა -1,90C, აგვისტოსი კი - 20,70C. კურორტი სამკურნალო თვისებებისა და მშვენიერი ბუნების გარდა, საინტერესოა კულტურული თვალსაზრისითაც, აქ რამდენიმე კულტურული ძეგლის მონახულება შეგიძლიათ, როგორიცაა: აღდგომის ეკლესია, ქვიშხეთის კოშკი, მთაწმინდის ეკლესია, ფერისცვალების ეკლესია, წმინდა გიორგის ეკლესია და წმინდა ელიას ეკლესია.