ლეჯიქეს არქიტექტურული კომპლექსი

ლეჯიქეს არქიტექტურული კომპლექსი სამეგრელოში, ჩხოროწყუს მუნიციპალიტეტის სოფელ ლეჯიქეში მდებარეობს. იგი IV-VI საუკუნეებით თარიღდება. ლეჯიქეს ციხე როგორც ჩანს, ეგრისის სამეფოს ცენტრალური მონაკვეთის თავდაცვით ქვესისტემაში შედიოდა. მის შესახებ ისტორიულ წყაროებში არანაირი ინფორმაცია არ გვხვდება. კომპლექსი მოიცავს გალავანს, კოშკებსა და სხვადასხვა დანიშნულების ნაგებობათა ნაშთებს. ციხეს ჩრდილოეთ, აღმოსავლეთ და სამხრეთ ხელოვნური თავდაცვითი თხრილი აქვს შემოვლებული. ნაგებობა ძალიან არის დაზიანებული, თუმცა მისი ფორმების დადგენა მაინც ხერხდება. შეიმჩნევა ორი კოშკი. ერთი მათგანი ციხის ჩრდილოეთ კუთხეში, გალავანშია ჩაშენებული. ის ჩრდილოეთ მისადგომებს აკონტროლებდა. კოშკი ძლიერ არის დანგრეული, შემორჩენილია ორი მეტრის სიმაღლის კედლები. ნაგებობას შესასვლელი მეორე სართულზე უნდა ჰქონოდა. მეორე კოშკი ციხის სამხრეთ-აღმოსავლეთ ნაწილში დგას. ის მხოლოდ 1.5 მეტრის სიმაღლეზეა შემორჩენილი. კოშკები ნაგებია კარგად გათლილი საშუალო ზომის კირქვის კვადრებით, რიგების დაცვით, კირის დუღაბზე, საპირე წყობებს შორის ჩაყრილია სვადასხვა ტიპის ქვა. გალავნის უდიდესი ნაწილი თითქმის სრულიად განადგურებულია და ფრაგმენტულადაა შემორჩენილი. გალავნის კედლები 1.40 მეტრის სისქისაა. გალავანიც კოშკების ანალოგიურადაა ნაშენი.