მარტყოფის მთავარანგელოზთა ეკლესია

მარტყოფის მთავარანგელოზთა ეკლესია ქვემო ქართლის მხარეში, გარდაბნის მუნიციპალიტეტის სოფელ მარტყოფში მდებარეობს. ტაძარი აგებულია 1779 წელს გაბრიელ ხუროშვილის მიერ. 1899 წელს იგი საფუძვლიანად შეუკეთებია დავით თუშმალიშვილს ადგილობრივი მოსახლეობისგან შეგროვებული თანხებით, 1992 წელს კი საბოლოოდ დასრულდა და მიეცა დღევანდელი სახე. ნაგებობა დარბაზულია და ნაგებია რიყის ქვითა და აგურით. ტაძრის იატაკზე იატაკზე დაგებულია ექვსკუთხა კერამიკული ფილები. სახურავის კეხზე, აღმოსავლეთ მხარეს, ფანჩატური-სამრეკლოა აღმართული. სამხრეთის მხრიდან ეკლესიას სწორკუთხა შესასვლელი აქვს. აღმოსავლეთ და დასავლეთ ფასადებზე აგურის რელიეფური ჯვრებია გამოსახული. ინტერიერი მოხატულია, იგი დეკანოზებმა მამა ანტონ და ზაზა ბეჟანიშვილებმა მოხატეს.