მშრალი ხიდი

მშრალი ხიდი 1849-51 წლებში აგებული ხიდია, რომელიც თბილისში, ათონელისა და ხიდის ქუჩებს შორის მდებარეობს. იგი ცნობილია ძველი ნივთების ბაზრობითა და ღია ცის ქვეშ მოწყობილი სამხატვრო გამოფენით. ვინტაჟური ნივთების მოყვარულები აქ მრავალ საინტერესო რამეს იპოვნიან, აქ ნახავთ ანტიკვარულ ჭურჭელს, ძველ სამოვრებსა და თუნგებს, საბეჭდ მანქანებს, ფირსაკრავებს, წიგნებს, ორიგინალურ სუვენირებს და ათასგავარ განსხვავებულ და საინტერესო ისტორიის მქონე ნივთს. ამიტომაც ამ ადგილს “მოგონებების ბაზრობასაც” ეძახიან. აქვე შეგიძლიათ შეიძინოთ ქართველი მხატვრების ფერწერული ნამუშევრები, ასევე ტრადიციულ მოტივებზე შექმნილი აქსესუარები და სხვა ნაკეთობები. მშრალ ხიდთან მდებარეობს დედა ენისა და 9 აპრილის ბაღები, სადაც ამწვანებულ გარემოში სეირნობასა და განტვირთვას შეძლებთ. ამ ადგილს განსაკუთრებულ ხიბლს სძენს ასევე ხიდის თავში, ერთმანეთის პირდაპირ მდგომი ორი კლასიცისტური ელემენტების მქონე ნაგებობა - ყოფილი სასტუმროები "გრანდ-ოტელი" და "ლონდონი". სასტუმრო “გრანდ-ოტელი” ცნობილია ტრაგიკული ისტორიითაც: სასტუმროს ერთ-ერთ ნომერში მოკლეს ცნობილი ნორვეგიელი ფერმწერის ედვარდ მუნკის მუზა - ნორვეგიელი მწერალი და მთარგმნელი დაგნი იული. ხიდის მიმდებარედ კაფეებსა და რესტორნებსაც მრავლად იპოვნით. ეს ადგილი დიდი პოპულარობით სარგებლობს, მას ხშირად სტუმრობენ როგორც ადგილობრივები, ასევე ტურისტები. ხიდის პროექტის ავტორი და მთავარი მშენებელი ჯოვანი სკუდიერია. მისი დაღუპვის შემდეგ კი მშენებლობა ინჟინერმა ბლიკსმა დაასრულა. თლილი ქვით ამოყვანილი ხიდის ქვეშ XX ს-ის 30-იანი წლებამდე მტკვრის ტოტი მიედინებოდა. ტოტის დაშრობის შემდეგ ხიდი შემორჩა და მას "მშრალი ხიდი" დაერქვა.