ნასოფლარ თალას ღვთისმშობლის ეკლესია

ნასოფლარ თალას ღვთისმშობლის ეკლესია მდებარეობს ქვემო ქართლის მხარეში, ბოლნისის მუნიციპალიტეტის თანამედროვე სოფელ სამწევრისის მიმდებარედ. სოფლების : ზემო ბოლნისი, შუა ბოლნისი (ყოფ. სარკინეთი, ინჯაოღლი) და სამწევრისი მახლობლად, მდინარე ბოლნისისწყლის გადაღმა მარცხენა ნაპირზე,

ეკლესია რესტავრირებულია. დასავლეთ კარის არქიტრავის ქვაზე დიდი ლაპიდრული ასომთავრული წარწერაა.

დარბაზული ეკლესია ნაგებია ფლეთილი ქვით კირ-დუღაბზე. კარის წირთხლებად ნათალი ქვაა გამოყენებული. შესასვლელი ორი აქვს - დასავლეთის და სამხრეთის. ორივე გარედან არქიტრავითაა დასრულებული, ეკლესიის მორთულობას შეადგენს სამხრეთის კარის არქიტრავზე ამოჭრილი მარტივი ჯვრის გამოსახულება, რომელიც ახლა მკრთალად ჩანს და დასავლეთის კარის არქიტრავზე შესრულებული ასომთავრულით შესრულებული ვრცელი და საამშენებლო წარწერა: „ქ. ნებითა და შეწევნითა ღმრთისაითა მე, რევის შვილმან ბოლნელ ეპისკოპოზმან იოსებ, ოდეს მოველ მეორეთ იერუსალემით, აღთვაშენე ეკლესია ყოვლად წმიდისა სახსრად სულისა ჩემისა და ცოდვათა ჩემთა შესანდობლად და ჟამთა ვითარებისაგან მოშლილი ზემო ბოლნისი ახოთა და თალა ხელახლა ვიშოე და ვათარხნე ხელმწიფეთაგან და არა ეთოებისრა ერთის სათათროს საურის მეტი, არა სამელიქო, არა სატარუღო. დაიწერა ქორონიკონსა ტლთ“ (1651 წ). ეკლესიის სამხრეთით შემორჩენილია ტაძრის ეზოს სამაგრი ჯებირი. ეკლესიის ჩრდილოეთით და აღმოსავლეთით სასაფლაოა შემორჩენილი, ხოლო უფრო მოშორებით შემორჩენილია ნასახლარი ბუდეები, რაც აქ სოფლის არსებობას მეტყველებს. ეკლესია აღდგენილია.