ნიჩბისის ღვთისმშობლის ეკლესია

ნიჩბისის ღვთისმშობლის ეკლესია მცხეთა-მთიანეთის მხარეში, მცხეთის მუნიციპალიტეტში, სოფელ ნიჩბისში მდებარეობს. ტაძარი აგებულია 1817 წელს. იგი დარბაზულ ნაგებობას წარმოადგენს, რომელიც აღმოსავლეთით ნახევარწრიული აფსიდით სრულდება. შესასვლელი ერთია - თაღოვანი, ჩრდილოეთიდან. კიდევ ერთი შესასვლელი დასავლეთით ყოფილა, რომელიც მოგვიანებით ამოუქოლავთ. აფსიდი გამოყოფილია ფართო მხრებით, რომლებსაც კაპიტელები ასრულებს. საკურთხევლის შუაში სატრაპეზო დგას. აფსიდის იატაკი შემაღლებულია. საკურთხევლის ორივე მხარეს დამხმარე სათავსია - სამკვეთლო და სადიაკვნე. დარბაზის ყველა კედელში თითო სარკმელია. ჩრდლოეთის სარკმელი ღიობთან შედარებით დიდი ზომის თაღოვან შეღრმავებაშია ჩასმული. აღმოსავლეთით თითო სარკმელი აქვთ დამხმარე სათავსებსაც. დარბაზის კამარა პილასტრებზე გადაყვანილ სამ საბჯენ თაღს ეყრდნობა. პილასტრები დეკორირებულია კაპიტელებით. ინტერიერი მთლიანად შელესილია. იატაკი მოპირკეთებულია ქვით. დასავლეთის სარკმლის ქვემოთ ჩასმულ ქვაზე ჯვრის გამოსახულება და მხედრული წარწერაა, რომლის თანახმადაც ეკლესია ააგეს სომხებმა, 1817 წელს. ტაძრის დასავლეთ კეხზე თაღებით გახსნილი სამრეკლო-ფანჩატური დგას. ფასადებს სადა ლავგარდანი ასრულებს. ეკლესია ნაგებია სხვადასხვა ზომისა და ფორმის ქვის ირეგულარული წყობით, ღიობებისა და ნაგებობის კუთხეებში გამოყენებულია დამუშავებული ქვები.