ნიჩბისის კიკოლაანთ საყდარი

კიკოლაანთ საყდარი მცხეთა მთიანეთის მხარეში, მცხეთის მუნიციპალიტეტში სოფელ ქვემო ნიჩბისში მდებარეობს. ძეგლი X საუკუნით თარიღდება. ეკლესია დარბაზული ნაგებობაა, რომელიც აღმოსავლეთით ნახევარწრიული აფსიდით სრულდება. შესასვლელი ერთია - სამხრეთიდან. საკურთხეველი საერთო სივრციდან მსუბუქად შვერილი კუთხეებით არის გამოყოფილი. აფსიდის იატაკი შემაღლებულია. აფსიდში სწორკუთხა სარკმელია გაჭრილი. საკურთხეველს საფეხური გასდევს, რომელზეც, სარკმლის ქვეშ, მთლიანი ქვის ტრაპეზი დგას. საკურთხევლის წინ რელიეფური ქვა დგას, რომელზეც ბერძნული ტიპის ჯვარი და წრეში ჩასმული სამი ვარდულია გამოსახული. დარბაზის კამარა უშუალოდ კედლებს ეყრდნობა. ჩრდილოეთის სარკმელთან ნუსხური წარწერა გვხვდება - "ქრისტე შეიწყალე გიორგი". ინტერიერი მთლიანად შელესილი და მოხატული ყოფილა, მოხატულობის კვალი აფსიდის სარკმლის გადამხურავ ფილაზეა შემორჩენილი. ეკლესიის დასავლეთ და ჩრდილოეთ ფასადებზე სარკმლის თაღები ერთიან ქვაშია ამოკვეთილი. ფასადები თაროსებრი ლავგარდნით სრულდება. ნაგებობა გადახურული იყო ლორფინით, მისი ნაწილი დღესაც შემორჩენილია. ეკლესია ნაგებია სხვადასხვა ზომისა და ფორმის ქვის ირეგულარული წყობით, კედლებში ჩართულია ლოდებიც.