ნუნისი

კურორტი ნუნისი იმერეთის მხარეში, ხარაგაულის მუნიციპალიტეტში მდებარეობს, ბორჯომ-ხარაგაულის ეროვნული პარკის სამხრეთ-აღმოსავლეთ ნაწილში, ზღვის დონიდან 750 მეტრზე. სოფელ ნუნისს დიდი ხნის ისტორია აქვს. ვახუშტი ბატონიშვილი იხსენიებს ნუნისის წყალს. ნუნისის ტერიტორიაზე მდებარეობს IX-X საუკუნეების ეკლესია და განვითარებული შუასაუკუნეების კლდეში ნაკვეთი კომპლექსი - ბერების კლდე, რაც ამ ადგილის ისტორიულობაზე მეტყველებს. ნუნისი გამოირჩევა ბუნების სილამაზით. მის უნიკალურ მიკროკლიმატს შერეული, ფოთლოვანი და წიწვოვანი ტყე ქმნის. აქ კურორტი 1856 წლიდან არსებობს. ნუნისი ცნობილია სამკურნალო თვისებების მქონე მინერალური წყლებით, რომელსაც სასმელად და აბაზანებისთვის იყენებენ. დასვენების სეზონი აქ მთელი წლის განმავლობაშია. უმშვენიერესი ტყეებით, სუფთა ჰაერით, სამკურნალო წყლებით და ულამაზესი ხედებით ეს კურორტი მრავალ დამსვენებელს იზიდავს. თუკი ბუნების სიმშვიდეში ჯანსაღი და კომფორტული დასვენება გსურთ, ნუნისი ამისთვის შესანიშნავი ადგილია.