ორბეთის ღვთისმშობლის ეკლესია

ორბეთის ღვთისმშობლის ეკლესია ქვემო ქართლის მხარეში, თეთრიწყაროს მუნიციპალიტეტის სოფელ ორბეთში მდებარეობს. იგი აგებულია 1910-1915 წლებში. ტაძარი საკმაოდ დიდ ჯვარგუმბათოვან ნაგებობას წარმოადგენს. ნაგებობა რთული გეგმარებისაა. ეკლესიის ცენტრალური სივრცე აბსიდისაგან გამოყოფილია ბემით. აბსიდი ექსტერიერში ხუთზახნაგაა. ინტერიერში მოწყობილია ფიცრის შეკიდული ჭერი, რომელიც კამარის კონსტრუქციასა და ნამდვილ სიმაღლეს ფარავს. ცენტრალური დარბაზის ოთხი კედელი მოხატულია ბიბლიური სიუჟეტებისა და წმინდანთა გამოსახულებებით, აქ გვხვდება: ოთხი მახარობელი, წმ. ბარბალე, ალექსანდრე ნეველი და სხვა. შესასვლელის თავზე აღმართულია სამრეკლო. ტაძარი თითქმის სრულიად მოკლებულია დეკორს. აფსიდის აღმოსავლეთის წახნაგზე ჯვრის რელიეფური გამოსახულებაა. ეკლესიის ყველა სარკმელი თაღოვანია. გუმბათს მთლიანად თუნუქის ფურცელი აქვს შემოვლებული. ტაძარი ნაგებია ორი ფერის - მორუხო და მოყვითალო თლილი ქვით.