ოცინდალეს ეკლესია

ოცინდალეს წმ. გიორგის ეკლესია სამარელოში, ჩხოროწყუს მუნიციპალიტეტის სოფელ თაიაში მდებარეობს. იგი XI საუკუნით თარიღდება. XIX საუკუნეში გამოქვეყნებული მასალის მიხედვით აქ ტაძარი თამარ მეფეს განუახლებია. ტაძარზე ამ ფაქტის აღმნიშვნელი წარწერაც ყოფილა დაცული. ოცინდალეს ეკლესია საუკუნეების განმავლობაში უმიშვნელოვანესი სარწმუნოებრივი ცენტრი იყო. აქ გიორგობის აღსანიშნავად მთელი სამეგრელოდან იკრიბებოდა მოსახლეობა. ეკლესია დარბაზულ ნაგებობას წარმოადგენს, ჩრდილოეთის მინაშენითა და კარიბჭით. აღმოსავლეთისა და სამხრეთის ფასადები თაღედებითაა დეკორირებული. სამხრეთის შუა თაღში სწორკუთხა შესასვლელია გაჭრილი, რომელსაც ნახევარწრიული ტიმპანი აქვს. დარბაზი აღმოსავლეთისა და დასავლეთის თითო და სამხრეთის ორი სარკმლით ნათდება. სარკმლებს ერთმანეთისგან განსხვავებული ორნამენტული საპირეები აქვთ. ფასადებს წრეთარგის მოხაზულობის ლავგარდანი ასრულებს. კარიბჭეს ფართო თაღოვანი შესასვლელი აქვს, რომელიც მაღალი ნიშებითაა ფლანკირებული. ეკლესია ნაგებია სუფთად თლილი ქვით. ეკლესიასთან შემორჩენილია ციხის ნაშთები, რომელიც სავარაუდოდ ტაძარზე ადრეული უნდა იყოს.