რიწის ტბა

რიწის ტბა აფხაზეთში, გუდაუთის მუნიციპალიტეტში მდებარეობს, მდინარე ბზიფის აუზში, ზღვის დონიდან 884 მეტრზე (აფხაზეთის ტერიტორია ამჟამად ოკუპრებულია რუსეთის მიერ). შერეული ტყით შემოსილ მთებს შორის მოქცეული ლურჯად მოლივლივე დიდი ტბა საოცრად ლამაზ სანახაობას წარმოადგენს და დიდ შთაბეჭდილებს ახდენს მნახველზე. რიწის ტბა და მისი მიდამოები უმშვენიერესია წლის ყველა სეზონზე. ტბის ქვაბული წარმოქმნილია გაგრის ქედის სამხრეთ-აღმოსავლეთ კალთიდან ჩამოქცეული კლდეზვავით, მდინარე ლაშიფსეს დაგუბების შედეგად. რიწის ტბის სარკის ფართობია 1,49 კმ², მაქსიმალური სიღრმე კი 101 მეტრი, იგი ამიერკავკასიაში ყველაზე ღრმა ტბაა. მას 6 მდინარე ერთვის, ყველაზე დიდია ლაშიფსე. ტბიდან გაედინება მდინარე იუფშარა. წყლის დონე მაქსიმუმს მაისში აღწევს, უმცირესს კი - თებერვალში. ტბაში თევზებიდან მხოლოდ კალმახი ბინადრობს. ტბისა და მისი შემოგარენის ბუნების დასაცავად 1946 წელს რიწის დაცული ტერიტორია შეიქმნა. რიწა საქართველოს ერთ-ერთი გამორჩეულად ლამაზი ტბაა და დიდი ტურისტული პოტენციალი გააჩნია.