საქართველოს პარლამენტი

საქართველოს პარლამენტის შენობა ქალაქ თბილისში, რუსთაველის გამზირზე მდებარეობს. მასში განთავსებულია საქართველოს უმაღლესი წარმომადგენლობითი ორგანო - პარლამენტი, რომელიც ახორციელებს საკანონმდებლო ხელისუფლებას, განსაზღვრავს ქვეყნის საშინაო და საგარეო პოლიტიკის ძირითად მიმართულებებს და აკონტროლებს მთავრობის საქმიანობას. პარლამენტის შენობა საქართველოს ყოფილი სსრ-ის მთავრობის სახლი იყო. იგი საბჭოთა პერიოდის ქართული არქიტექტურის მნიშვნელოვანი ნიმუშია. შენობა ორი კორპუსისგან შედგება, ზედა კორპუსი აშენდა 1938 წელს, მეორე, რუსთაველის გამზირისპირა კორპუსი კი - 1953 წელს. ორივე კორპუსის გადაწყვეტაში გამოყენებულია ძველი ქართული ხუროთმოძღვრების მოტივები, როგორც ცალკეულ ნაწილთა კომპოზიციაში, ისე დეკორსა და მოსაპირკეთებელ მასალაში- ოქროსფერი ტუფი. კორპუსებს შიდა ეზო-ვესტიბიული აერთიანებს, რომელიც კიბეებითა და შადრევნებით მიუყვება რელიეფს. პარლამენტის შენობის ადგილას ალექსანდრე ნეველის სამხედრო ტაძარი იდგა, რომელიც მეფის რუსეთის მიერ კავკასიის დაპყრობის აღსანიშნავად აიგო 1865-1866 წლებში. გასაბჭოების შემდეგ ტაძარი დაანგრიეს და მის ადგილას 1938 წლიდან ეტაპობრივად დაიწყო მთავრობის სახლის მშენებლობა, რომელიც 1965 წლამდე გაგრძელდა. პროექტის ავტორები არიან არქიტექტორები: კოკორინი, ლეჟავა და ნასარიძე. პარლამენტის შენობის წინ ვითარდებოდა 1989 წლის 9 აპრილის ტრაგიკული მოვლენები. საბჭოთა არმიამ აქ დაარბია ანტი-საბჭოთა, საქართველოს დამოუკიდებლობის მოთხოვნით მოწყობილი მშვიდობიანი დემონსტრაცია, რაც მსხვერპლით დამთავრდა. პარლამენტის წინ 9 აპრილს დაღუპულთა მემორიალი დგას.