სავანის წმ. გიორგის ეკლესია

სავანის წმ. გიორგის ეკლესია იმერეთის მხარეში, საჩხერის მუნიციპალიტეტში მდებარეობს, სოფელ სავანეში. იგი XI საუკუნის პირველი მეოთხედით თარიღდება, სამხრეთის შესასვლელის წარწერაში აღნიშნულია ძეგლის აგების ზუსტი თარიღი - 1046 წელი. იმავე წარწერაში მოხსენიებულია ადგილობრივი ფეოდალი - ერისთავთერისთავი გიორგი გულზვიადის ძე, დასავლეთ შესასვლელის წარწერა კი გვამცნობს, რომ ეკლესია ხუროთმოძღვარ ჰარაბას აუგია. ტაძარი დარბაზულ ნაგებობას წარმოადგენს, რომელსაც სამხრეთით მთელ სიგრძეზე კარიბჭე გასდევს. კარიბჭეც XI საუკუნისაა, თუმცა ის დარბაზთან შედარებით უფრო მოგვიანებით, სხვა ოსტატის მიერ უნდა იყოს მიშენებული. ნაგებობა დახვეწილი და ჰარმონიული პროპორციებითა და მდიდრული ჩუქურთმებით გამოირჩევა. ეკლესია უხვი და მოტივებით მდიდარი მორთულობითაა შემკული, რომლებიც ორგანულად ერწყმის ნაგებობის ხუროთმოძღვრულ ფორმებს. მაღალია ჩუქურთმების შესრულების ხარისხი. ეკლესიაში XI საუკუნის მდიდრულად მოჩუქურთმებული თაბაშირის კანკელია, რომელიც ძლიერაა დამახინჯებული XIX საუკუნეში, შეკეთების დროს. ეკლესიის დასავლეთით XIX საუკუნის სამრეკლო დგას.