სიონი

კურორტი სიონი მცხეთა-მთიანეთის მხარეში, თიანეთის მუნიციპალიტეტში, სიონის წყალსაცავის ნაპირას მდებარეობს, ზღვის დონიდან 1000 მეტრზე. იგი ადგილობრივი მნიშვნელობის კლიმატურ-ბალნეოლოგიური კურორტია. სიონი გამოირჩევა ულამაზესი ბუნებით. მთები, ტყეები, საოცარი ხედები, ლურჯად მოლივლივე წყალი, სუფთა ჰაერი და ჯანსაღი გარემო მრავალ დამსვენებელს იზიდავს. სიონის წყალსაცავის ადგილას შუასაუკუნეების რამდენიმე კულტურული ძეგლი იდგა, რომელთა უმრავლესობაც ამჟამად დატბორილია. ერთ-ერთი ძეგლი, V საუკუნის ბაზილიკა, წყალსაცავის შექმნისას დაშალეს და თბილისში, ეთნოგრაფიულ მუზეუმში გადმოიტანეს. ბუნების სიმშვიდეში დასვენების მოყვარულთათვის სიონი ერთ-ერთი შესანიშნავი ადგილია და მას ყოველწლიურად მრავალი ადამიანი სტუმრობს.