სვერი

სოფელი სვერი იმერეთის მხარეში, ჭიათურის მუნიციპალიტეტში მდებარეობს. სოფელი გამოირჩევა ბუნების სილამაზითა და კულტურული ძეგლების სიმრავლით. სიმწვანე, სუფთა ჰაერი, კლდეები, გამოქვაბულები და ჩანჩქერი მიმზიდველ გარემოს ქმნის ხეტიალის მოყვარულთათვის. სვერის ტერიტორია უძველესი დროიდან ყოფილა დასახლებული, რაზეც აქ გამოვლენილი ქვის ხანის, გვიანბრინჯაო-ადრერკინის, ადრეანტიკური და შუა საუკუნეების არქეოლოგიური მასალა მეტყველებს. აქ მდებარეობს მნიშვნელოვანი არქეოლოგიური ძეგლი - კოტიას მღვიმე, სადაც კავკასიის არქეოლოგის ისტორიაში პირველად პალეოლითელი ადამიანის მთლიანი ჩონჩხი აღმოაჩინეს. სოფელი სვერი იხსენიება შემდეგ წერილობით წყაროებში: ვახუშტი ბაგრატიონის „აღწერა სამეფოსა საქართველოსა“, მატიანე ქართლისა, „დასტურლამალი“, ნიკო დადიანის „ქართველთ ცხოვრება“, ქართული ისტორიული საბუთები, 1650-1652 წწ. ტოლოჩანოვისა და იევლევის ელჩობის აღწერილობა, იოჰან გიულდენშტედტის „მოგზაურობა საქართველოში“. სვერში შეგიძლიათ მოინახულოთ სვერის ციხე, რომელსაც რამდენიმე ბრძოლა უკავშირდება, კლდეკარის მღვიმის ეკლესია, ხეთაგაანთ კოშკი, სვერის ციხე-გალავანი, კოტიას მღვიმე და 1800 წელს აგებული იოანე ნათლისმცემლის ეკლესია.