ტაგნაგეთის კომპლექსი

ტაგნაგეთის კომპლექსი ქვემო ქართლის მხარეში, თეთრიწყაროს მუნიციპალიტეტის სოფელ ერტისში მდებარეობს. იგი გვიანი შუასაუკუნეების ძეგლია და სათავდაცვო კოშკსა და ეკლესიას მოიცავს. ტაგნაგეთის კოშკი რვასართულიან ნაგებობას წარმოადგენს. სართულები ერთმანეთს ხის კიბით უკავშირდება. კარი გაჭრილია პირველი სართულის სამხრეთ-დასავლეთ კედელში, შესასვლელი თაღოვანია. ამავე კედლის სამხრეთ-დასავლეთ კედელში ჩატანებულია კერამიკული მილი. სართულშუა გადახურვა ხის კოჭებზე ყოფილა მოწყობილი, მთლიანად მხოლოდ VII სართულის იატაკია შემორჩენილი. მეორე სართულზე ბუხარი იყო მოწყობილი, მეოთხეზე კი აივანზე გასასვლელი. სათოფურების კონსტრუქცია სხვადასხვაა - არქიტრავული, თაღოვანი და ხის ზღუდარებით. კოშკი ნაგებია ფლეთილი ქვით, მეშვიდე და მერვე სართულები კი - ქართული აგურით. კოშკის ჩრდილო-აღმოსავლეთით დარბაზული ეკლესია მდებარეობს. იგი აღმოსავლეთით სწორკუთხედში ჩაწერილი ნახევარწრიული აფსიდით სრულდება. ტაძრის გადახურვა წყვილ პილასტრს ეყრდნობოდა, თუმცა ამჟამად ჩანგრეულია, შემორჩენილია მხოლოდ კონქის მცირე ნაწილი. ნაგებობას სამხრეთიდან აქვს ერთადერთი თაღოვანი შესასვლელი. ეკლესია ნაგებია ნატეხი ქვით, კონქი და კარის თაღოვანი ჩარჩო გამოყვანილია აგურით.