ტანძიის ღვთისმშობლის ეკლესია

ტანძიის ღვთისმშობლის ეკლესია მდებარეობს ქვემო ქართლში, ბოლნისის მუნიციპალიტეტის სოფელ ტანძიის ტერიტორიაზე.

ეკლესია აშენებულია სომხითის მოურავისა და საბარათიანოს თავადის პაპუნა ყაფლანიშვილის მიერ 1670 წ. ეკლესია დარბაზულია. ნაგებია ნატეხი ქვით დუღაბზე. კუთხეებში და კონსტრუქციულ ნაწილებში თლილი კვადრებია გამოყენებული. შესასვლელი სამხრეთიდან და დასავლეთიდან აქვს. დასავლეთის კარის არქიტრავზე შეისრული თაღია მოცემული, რომელშიც წარწერაა მოთავსებული. ეკლესიას დასავლეთიდან სამრეკლო ჰქონდა მიდგმული, რომლის პირველი სართული კარიბჭის როლს ასრულებდა, მეორე კი სამრეკლო ფანჩატური იყო. ამჟამად მხოლოდ კარიბჭეა შემორჩენილი. ფასადის პერანგი ნაწილობრივ მორღვეულია. სახურავი დაცურებულია. აქა-იქ ლორფინებია მიმოფანტული. ეკლესიის აღმოსავლეთ ფასადზე წარწერა ასე იკითხება: „ქ. სამკვიდროთა ჩვენთა, ტაშირის და საორბელოთ პატრონი და მრავლისა დიდებისას მქონებელი, ხუთთა ძმათა უფროსი, უძეო ვიქმენით და ხელ ვყავი ამას ჩვენთვის სახსენებლად, შენდობა ბრძანეთ, გევედრები. ქორონიკონსა 368 სრულ იქმნა“. ასევე წარწერაა დასავლეთ ფასადზეც: „ქ. ნებითა და შეწევნითა ღმრთისათა, ჩვენ პატრონის ყაფლანის შვილმა ბატონმა ბანგიჯასპიმ, აღვაშენე წმიდა ესე ტაძარი კარისა ღვთისმშობლის სახელზედა ჩვენდა შესანდობელად“.