წაღვერი

კურორტი წაღვერი სამცხე-ჯავახეთის მხარეში, ბორჯომის მუნიციპალიტეტში მდებარეობს, თრიალეთის ქედის ჩრდილოეთ კალთებზე, ზღვის დონიდან 1020-1130 მეტრზე. იგი ბალნეო-კლიმატური კურორტია. წაღვერი გარშემორტყმულია წიწვოვანი ტყით დაფარული მაღალი მთებით. მის ბუნებრივ სამკურნალო ფაქტორებს წარმოადგენს დაბლობისა და მაღალი მთის კლიმატს შორის გარდამავალი ჰავა და სხვადასხვა მინერალებით მდიდარი სამკურნალო წყლები. კურორტისთვის დამახასიათებელია ზომიერად რბილი, საკმაოდ თოვლიანი ზამთარი და ზომიერად თბილი, მშრალი ზაფხული. თუკი ბუნების სიმშვიდეში დასვენება და ჯანმრთელობაზე ზრუნვა გსურთ წაღვერი ამისთვის შესანიშნავი ადგილია. დამსვენებლებს ადგილობრივები კეთილმოწყობილ საოჯახო სასტუმროებსა და საკუთარი ხელით მოყვანილ ბიო პროდუქტებს სთავაზობენ. თუკი ხეტიალის მოყვარული ხართ, აქ პატარა ლაშქრობების მოწყობასაც შეძლებთ, მონიშნულია სხვადასხვა სირთულის სალაშქრო ბილიკები. სალაშქრო ბილიკების შესახებ ინფორმაციის წაღვერის ტურისტულ ცენტრში მიიღებთ. წაღვერში შეგიძლიათ დალაშქროთ უზნარიანის ციხე, მთა გვირგვინა, მთა ტორტიზა და ა.შ. აღსანიშნავია XIV საუკუნის დაბის წმინდა გიორგის ერთნავიანი ეკლესია, რომელიც კლდეში გამოჭრილ ბაქანზე დგას. წაღვერი მიმზიდველია როგორც სამკურნალო თვისებებით, ასევე ბუნების სილამაზითა და საინტერესო კულტურული ძეგლებით.