წინარეხი - თავკავთა

მარშრუტი იწყება თბილისთან ახლოს, სოფელ წინარეხში და მიუყვება მდინარე კავთურას ხეობას თავკავთას წმინდა გიორგის ეკლესიამდე. მარშრუტი არის მარტივი, რადგან არ გიწევთ დიდი აღმართებისა და გრძელი მანძილის გავლა. თუმცა რამდენიმე მონაკვეთი საკმაოდ ტექნიკურია და რეკომენდებულია კარგი სალაშქრო ფეხსაცმლის გამოყენება. ასევე თან იქონიეთ გამოსაცვლელი ფეხსაცმელი, რადგან შეიძლება მოგიწიოთ მდინარეში გატოპვა. თავიდან მარშრუტი მიუყვება ქვათახევის მონასტერში მიმავალ  სამანქანო გზას, დაახლოებით 4 კილომეტრში უხვევს ამ გზიდან და ძველი სატყეო გზით მიემართება თავკავთას მიმართულებით. კიდევ 1 კილომეტრის შემდეგ სამანქანო გზა სრულდება და იწყება ბილიკი, რომელიც რამდენიმე ადგილას მდინარესთან ძალიან ახლოს გადის და შეიძლება დაკარგოთ კიდეც, ამიტომ აუცილებლად იქონიეთ GPS ტრეკი რათა სწორად მიყვეთ ბილიკს და არ მოგიწიოთ მდინარეში სიარული საჭიროების გარეშე.

მარშრუტის ბოლო 1 კილომეტრი ყველაზე რთულია, რადგან იგი მივება ციცაბო აღმართს რომლის ბოლოშიც იხილავთ წმინდა გიორგის ეკლესიას. ეკლესიის გვერდით არის გადმოსახედი, საიდანაც ულამაზესი ხედი იშლება სოფელ წინარეხზე და მის შემოგარენზე.