წინარეხის ჯვარპატიოსნის ეკლესია

წინარეხის ჯვარპატიოსნის ეკლესია მდებარეობს შიდა ქართლში, კასპის მუნიციპალიტეტის სოფელ წინარეხში. მდებარეობს სოფლის ჩრდილოეთით 3 კილომეტრზე.

ტაძარი დარბაზული ტიპის ნაგებობაა სამხრეთის მინაშენით. აშენებულია ქვიშაქვის და ნიჩბისის ქვით კირ-დუღაბზე, თაღების და სხვა არქიტექტურული დეტალებისთვის გამოყენებულია შირიმი. ქვედა რიგებში გამოყენებულია დიდი ზომის ქვიშაქის ქვები, ზემოთ კი უფრო მცირე ზომის. შესასვლელი სამხრეთი კედლის დასავლეთ ნაწილში და ჩრდილოეთი კედლის აღმოსავლეთ ნაწილში ქონდა. ჩრდილოეთის კარი მოგვიანებითაა ამოშენებული. ორივე კარი გარედან არქიტრავულია, შიგნიდან თაღოვანი. ტაძარი განათებული იყო აღმოსავლეთის და დასავლეთის თითო და სამხრეთის ორი სარკმლით. აღმოსავლეთის კედლის თავსართი შემკულია რელიეფით: გორაზე აღმართული სამი ჯვრის გამოსახულებით. ტაძრის სიმაღლისკენ სწრაფვა უფრო საგრძნობი ხდება ინტერიერში. აღმოსავლეთით ნახევარწრიული აბსიდაა, რომლის ღერძზე ერთი სარკმელია გაჭრილი. მის ქვეშ ქვის ტრაპეზია. სარკმლის ორივე მხარეს მცირე ზომის სწორკუთხა ნიშია. ეკლესია შიგნიდან შელესილი იყო, მხატვრობა მხოლოდ საკურთხევლის სარკმლის წირთხლშია შემორჩენილი. ეკლესიის სამხრეთი მინაშენიდან მხოლოდ საძირკვლის პირველი წყებაა შემორჩენილი. მინაშენი მთელ სიგრძეზე ეკვროდა ტაძარს, მასაც შესასვლელი სამხრეთიდან ქონდა. ტაძრის სამხრეთით და აღმოსავლეთით 8-10 მეტრში გალავნის ნაშთი იკითხება