წყალტუბო

ქალაქი და კურორტი წყალტუბო იმერეთის მხარეში, წყალტუბოს მუნიციპალიტეტში მდებარეობს, ზღვის დონიდან 95-120 მეტრზე. იგი გამოირჩევა სამკურნალო თვისებებითა და ლამაზი ბუნებით. კურორტის ტერიტორიაზე დაახლოებით 150 ჯიშის მრავალწლიანი ფოთლოვანი და წიწვოვანი მცენარეა გაშენებული. წყალტუბო ბალნეოლოგიური კურორტია და განთქმულია თერმულ-რადონული მინერალური წყლის აბაზანებით. ქალაქში ფუნქციონირებს სანატორიუმი, სასტუმროები, პოლიკლინიკა და ალერგოლოგიის, ასთმისა და კლინიკური იმუნოლოგიის სამეცნიერო კვლევითი ინსტიტუტი. კურორტის ტერიტორიაზე შექმნილია ხელოვნური ტბა - „ცივი ტბა“. თუკი კომფორტული და გამაჯანსაღებელი დასვენება გსურთ აქ შესანიშნავი გარემო დაგხვდებათ. მწვანეში ჩაფლული კურორტი ლამაზი ბაღებით, ხეივნებითა და სამკურნალო წყლებით საუკეთესოა განტვირთვისთვის. წყალტუბო ჯერ კიდევ VII-IX საუკუნეებში იყო ცნობილი, XII-XIII საუკუნეებში კი იგი უკვე ფართო პოპულარობით სარგებლობდა, როგორც სამკურნალო პუნქტი. პირველი ცნობები წყალტუბოს სამკურნალო წყლების შესახებ 1782 წელს „ბერლინის საბუნებისმეტყველო საზოგადოების შრომების“ გამოცემებში ქვეყნდება. კურორტის გაშენება 1926 წელს დაიწყო, 1931 წლის დადგენილებით წყალტუბო კურორტად და ბალნეოთერაპიის ცენტრად გამოცხადდა. კურორტი დღემდე დიდი პოპულარობით სარგებლობს და მრავალ დამსვენებელს იზიდავს.