წვირმის მთავარანგელოზის ეკლესია ნაკა თარინგზელი

წვირმის მთავარანგელოზის ეკლესია ნეკა თარინგზელი სვანეთში, მესტიის მუნიციპალიტეტის სოფელ წვირმის ერთ-ერთ უბანში - ქვემო ჩობანში მდებარეობს. იგი X საუკუნით თარიღდება. ტაძრის ინტერიერში XII საუკუნის უნიკალური კედლის მხატვრობაა დაცული. ეკლესია დარბაზულ ნაგებობას წარმოადგენს, რომელსაც დასავლეთიდან მინაშენი ეკვრის. ტაძარი ერთსაფეხურიან ცოკოლზე დგას. საყურადღებოა ნაგებობის აღმოსავლეთ ფასადის მხატვრული გადაწყვეტა: აღმოსავლეთის ფასადის ცენტრალურ ღერძზე სადა, სრულიად მოურთველი სარკმელია, რომელიც ორი მაღალი, სამკუთხა ნიშით არის ფლანკირებული. ნიშები დეკორირებულია სიღრმეში მოთავსებული კონის ფორმის ბაზისებზე დაყრდნობილი მსხვილი ლილვებით. ფასადებს თაროსებრი ლავგარდანი ასრულებს. საფასადო ნიშები სვანეთში მხოლოდ ნეკა თარინგზელის ტაძარში გვხვდება. ეკლესია ნაგებია თლილი შირიმის კვადრებით, მინაშენი კი - ფიქლით. ძეგლი უხეშადაა რესტავრირებული.