ტვიბის მთავარანგელოზის ეკლესია

ტვიბის მთავარანგელოზის ეკლესია სვანეთში, ლენტეხის მუნიციპალიტეტის სოფელ ტვიბში მდებარეობს. იგი X-XI საუკუნეებით თარიღდება. იგი დარბაზულ ნაგებობას წარმოადგენს, აღმოსავლეთით სწორკუთხედში ჩაწერილი შებრტყელებული აფსიდით. კამარა შეკიდულ კაპიტელებზე გადაყვანილ თაღებს ეყრდნობოდა, თუმცა დღესდღეობით ჩამოქცეულია. აფსიდში ორი მაღალი და ორად გატიხრული ღრმა ნიშაა. ინტერიერი მთლიანად მოხატულია, ფრესკები შემორჩენილია დაზიანებული სახით. მოხატულობაში გვხვდება ვედრების, ხარების, ნათლისღების, ლაზარეს აღდგინების და შობის სცენები, ასევე წმ. გიორგის, წმ. თევდორეს, მღვდელმთავრების, წმ. დედების, მთავარანგელოზის და ქტიტორთა გამოსახულებები. ფასადები სადაა. შემკულობა მხოლოდ დასავლეთის ფასადზეა, კარს და მის თავზე სარკმელს გადანაკეციანი სადა თავსართები ამკობს. ჩრდილოეთ ფასადზე გველეშაპის მკრთალი გამოსახულებაა შემორჩენილი, როგორც ჩანს, ფასადები მთლიანად მოხატული იყო.