ჟაბეშის მაცხოვრის ეკლესია

ჟაბეშის მაცხოვრის ეკლესია სვანეთში, მესტიის მუნიციპალიტეტში, მულახის თების სოფელ ჟაბეშში მდებარეობს. იგი X-XI საუკუნეებით დათარიღებული, შირიმის თლილი ქვით ნაგები, დარბაზული ნაგებობაა. აღმოსავლეთ-დასავლეთ ღერძზე წაგრძელებული ტაძარი მწყობრი პროპორციებით გამოირჩევა. ეკლესიის საფასადო გაფორმებას სამთაღედის კომპოზიცია უდევს საფუძვლად, რომელიც ზედა ნაწილში სვანური კოშკების გვირგვინებისთვის დამახასიათებელ, დაკბილულთაღებიანი სალოდეების მონახაზს იმეორებს.  სამთაღედის შიდა წყვილი კბილი  შეწყვილებული ლილვებით უკავშირდება ცოკოლს. აღმოსავლეთ ფასადის შუა თაღში გაჭრილია ვიწრო, თაღოვანი სარკმელი, დასავლეთ კედლის შუა თაღი კი შესასვლელს ეთმობა. აღწერილი საფასადო კომპოზიცია, როგორც ეპოქისათვის ნიშნეული მხატვრული ტენდეცია, რეგიონისთვის სახასიათო არქიტექტურულ მოტივებსაც  წარმოაჩენს. ტაძარის ინტერიერში შემორჩენილია XII საუკუნის კედლის მხატვრობის ფრაგმენტები. ამჟამად ეკლესიის შესასვლელს უახლოეს წარსულში მიშენებული სტოა ფარავს, რომლის იატაკი და კიბის საფეხურები მეტლახის ფილებით არის მოპირკეთებული. აღნიშნული სტოა და სამხრეთ ფასადზე მიდგმული ცალქანობა მინაშენი ტაძარზე განხორციელებული უკანონო არქიტექტურული ჩარევის შედეგია, რაც უხეშად არღვევს ტაძრის თავდაპირველ იერსახეს. ჟაბეშის მაცხოვრის ეკლესია ეროვნული მნიშვნელობის ძეგლია, რომლის დაცვა და შენარჩუნება ძალიან მნიშვნელოვანია.