არგვეთის ოქონოს ღვთისმშობლის ეკლესია

არგვეთის ოქონოს ღვთისმშობლის ეკლესია მდებარეობს საჩხერის მუნიციპალიტეტში, ზემო იმერეთში.

ეკლესია დარბაზულია, დასავლეთიდან გვიანი პერიოდის მინაშენით. ნაგებია კირქვის ნათალი ქვით. აღმოსავლეთით ღრმა აბსიდია, რომლის ღერძზე თაღოვანი სარკმელია გაჭრილი. საკურთხეველი გამოყოფილია ორსაფეხურიანი მხრებით, რომელზეც კონქის საბჯენი თაღია გადასული. გრძივი კედლები დანაწევრებულია ორი წყვილი ორსაფეხურიანი პილასტრით, რომლებზეც კამარის საბჯენი ორსაფეხურიანივე თაღები გადადის. ჩრდილოეთის და სამხრეთის კედლებში არქიტრავული კარია გაჭრილი. სამხრეთის კედელში ორი სწორკუთხა სარკმელია. ერთი სარკმელი აქვს დასავლეთის კარის თავზეც. ამჟამად ის მინაშენშია მოქცეული. ეკლესიის ჩრდილოეთის და სამხრეთის კართა გაფორმება გვიანია (გადაკეთება-მიშენებისდროინდელი). ტაძარს მარტივი თაროსებრი ლავგარდანი აქვს. ფასადები გალესილი ყოფილა კირით. ახლა უკვე ჩამოცვენილია. მინაშენი ნატეხი ქვითაა აგებული. შესასვლელი დასავლეთიდან აქვს. კარის მოჩარჩოება იდენტურია ეკლესიის დანარჩენი კარების მოჩარჩოების. ეკლესიას სამხრეთიდან მინაშენი ქონია ასევე შემდგომი პერიოდის (1982 წელს ჯერ კიდევ იყო). ის დღეს აღარ არსებობს. ეკლესიის მორთულობა მწირია. მთავარი დატვირთვა აღმოსავლეთ ფასადზე მოდის. მორთულია სარკმლის მოჩარჩოება და მის ზემოთ მოცემულია რელიეფური დიდი ჯვარი. ჯვარის თავზე ვერძის ჰორელიეფი იყო, რომელიც ახლა ჩამომტვრეულია.

ეკლესიის დასავლეთით რამდენიმე მეტრში დგას სამსართულიანი სამრეკლო. პირველი და მეორე სართული ყრუა და მასში მესამე სართულზე ასასვლელი კიბეა მოქცეული. მესამე სართული ფანჩატურია.