არმაზის ღვთისშობლის ეკლესია

არმაზის ღვთისშობლის სახელობის სამონასტრო კომპლექსი - ძველი ქართული ხუროთმოძღვრების ძეგლი, მდინარე არმაზისწყლის მარჯვენა ნაპირზე, მცხეთის მუნიციპალიტეტში, მცხეთიდან 2 კმ-ში. აგებულია XII საუკუნის მეორე ნახევარში. ამჟამად, აქ ფუნქციონირებს მამათა მონასტერი.

სამონასტრო კომპლექსი შემავალი ნაგებობებია: ეკლესია, კარიბჭე, სამრეკლო, მინაშენი და საძვალე. მთავარი ნაგებობა დარბაზული ეკლესიაა. ეკლესია, კარიბჭე და მინაშენი ნაგებია ნატეხი ქვითა და აგურით, საძვალე — რიყისა და ნატეხი ქვით, აგური ნახმარია დეკორატიული მიზნით. ეკლესიასა და კარიბჭეში შემორჩენილია XII საუკუნის კედლის მხატვრობის ფრაგმენტები. ეკლესიის დასავლეთით მდებარე სამრეკლო XVI-XVII საუკუნეებს განეკუთვნება.