ბარალეთის ღვთისმშობლის ეკლესია

ბარალეთის ეკლესია სამცხე-ჯავახეთის მხარეში, ახალქალაქის მუნიციპალიტეტის სოფელ ბარალეთში მდებარეობს. იგი XIII საუკუნის ორნავიანი ბაზილიკაა. ნავები აღმოსავლეთით ნახევარწრიული აბსიდებით სრულდება. ცენტრალური ნავის კონქი ჩრდილოეთის პილასტრსა და სამხრეთით შეკიდულ კაპიტელზე გადასულ თაღს ეყრნობა. სამხრეთის ნავი უფრო დაბალი და ვიწროა და ცენტრალური ნავისგან სამ ბოძზე გადასული თაღებითაა გაყოფილი. ეკლესია ნაგებია თლილი ქვის კვადრებით, დახურულია ლორფინით. შესასვლელი სამხრეთიდანაა. ყველა ფასადზე თითო სარკმელია გაჭრილი. კედლები სრულდება თაროსებრი ლავგარდნით. ჩრდილოეთის კედელში ოთხი პილასტრია, სამხრეთით, პილასტრების ნაცვლად ბოძებია. პილასტრებსა და ბოძების თავზე შეკიდულ კაპიტელებზე კამარის საბჯენი თაღებია გადასული. ფასადების გაფორმება მწირია. ცენტრალური ნავის სამხრეთ კედელში სარკმლის საპირეზე გამოსახულია დანიელი ლომების ხაროში. ამჟამად დანიელის ფიგურა დაკარგულია სარკმლის ჭრილის გადიდების შედეგად. დასავლეთი სარკმლის თავზე ბოლნური მედალიონია მოცემული. აღმოსავლეთის ფასადზე კი საამშენებლო წარწერაა: „აღაშენა ეკლესიაი ესე მათ ჟამთა, ოდეს ლაშა მეფედ დაჯდა. ადიდენ ღმერთმან ორთავე ცხოვრებათა შინა. საყდრისა “. ტაძარს დასავლეთ კიდეში მე-19 საუკუნეში დაადგეს ფანჩატუროვანი სამრეკლო. ეკლესია შიგნიდან შეთეთრებულია, გარედანაც შეთეთრების კვალი ეტყობა. ინტერიერი ისეა შებათქაშებული, რომ მისი სტრუქტურის თავდაპირველობაზე რთულია რაიმეს თქმა.
სოფელში ასევე შეგიძლიათ ნახოთ XIX საუკუნის ბარალეთის სომხური ეკლესია.

როგორ მივიდეთ

სოფელი ბარალეთი ახალქალაქიდან 20 კმ-ში მდებარეობს. სოფლამდე მიდის სამანქანო, მოასფალტებული გზა.