ჩხარი

სოფელი ჩხარი იმერეთის მხარეში, თერჯოლის მუნიციპალიტეტში მდებარეობს, ზღვის დონიდან 280 მეტრზე. ჩხარში შუასაუკუნეების რამდენიმე ძეგლი გვხვდება. სოფელში ასევე არის უთხოვარის კორომი. სოფლის ტერიტორიაზე ჯერ კიდევ ქვის ხანაში ცხოვრობდა ადამიანი, ბრინჯაოსა და რკინის ხანაში კი იგი ფართოდ იყო ათისებული. აქ გამოვლენილია ანტიკური პერიოდის სამარხებიც, სადაც ვერცხლისა და ბრინჯაოს ნივთებია აღმოჩენილი. ჩხარი წერილობით წყაროებში პირველად XVI საუკუნეში იხსენიება, როგორც სავაჭრო-სახელოსნო დასახლება. გვიან ფეოდალურ ხანაში იგი მეფეთა და მიტროპოლიტთა საზაფხულო რეზიდენცია იყო. ვახუშტი ბაგრატიონი ჩხარის შესახებ წერს: „კუალად ჩხარს მოერთვის მეორე ჩხარულა ... ამ ხევზედ არს მთის ძირს ჩხარი, ეს ყოფილა ქალაქი, არამედ აოხრდა ლევან დადიანისაგან. აწ არს დაბა“. ლევან დადიანის განადგურებული ჩხარი XVIII საუკუნის 30-იან წლებში აღდგა. 1819-1820 წლების აჯანყებისას იგი აჯანყების ძლიერი კერა გახლდათ, ჩხარის ეპისკოპოსი, გენათელი მიტროპოლიტი ექვთიმე აჯანყების ერთ-ერთი ხელმძღვანელი იყო. აჯანყების ჩახშობის დროს ჩხარი გადაწვეს, XIX საუკუნის დასაწყისში კი ის უკვე სოფლად იქცა. სოფელში შეგიძლიათ მოინახულოთ ოქონის მაცხოვრის აღდგომის ეკლესია და წმ. გიორგის ეკლესია.