დაშბაშის კანიონი

დაშბაშის კანიონი ქვემო ქართლის მხარეში, წალკის მუნიციპალიტეტში, მდინარე ხრამის ხეობაში, სოფელ დაშბაშის მიდამოებში მდებარეობს, ზღვის დონიდან 1110-1448 მეტრზე. ბუნების ძეგლი მდ. ქციის (ხრამის) მიერ დაშბაშის ლავურ მაღლობზე, ვულკანოგენურ ქანებში ჩაჭრილ კალაპოტში გამომუშავებულ იშვიათი და ბიომრავლფეროვნებით გამორჩეულ კანიონისებურ ხეობას წარმოადგენს. მწვანეში ჩაფლული დაშბაშის ჩანჩქერი სამოთხისებური იდილიურობითა და სილამაზით უამრავ მნახველს იზიდავს. კანიონის პოპულარობა იმითაცაა განპირობებული, რომ ფეხით გასავლელი მანძილი მცირეა და ნებისმიერ მსურველს მარტივად, დიდი ძალისხმევის გარეშე შეუძლია ამ საოცარ ადგილს ესტუმროს. მართალია დაშბაშის კანიონის ყველაზე ცნობილი ადგილი სწორედ დიდი კასკადური ჩანჩქერია, თუმცა კანიონის სიგრძე 8 კმ-ს აღწევს და კიდევ მრავალი საინტერესო და ძალიან ლამაზი ადგილის ნახვა შეიძლება, თუკი ბოდიალისა და თავგადასავლების მოყვარული ხართ და რელიეფის სირთულეც არ გაშინებთ. კანიონში არსებულ ციცაბო ფერდობებზე შეფენილი მცენარეულობა და თვალწარმტაცი ჩანჩქერები სრულიად განსხვავებულ მიკროლანდშაფტს ქმნის. ხრამის ხეობაში ასევე გვხვდება როგორც ბუნებრივი, ისე ადამიანის შექმნილი გამოქვაბულები. სოფელ დაშბაშთან ახლოს არის ულამაზესი ტყე, რომელიც შესანიშნავი საპიკნიკე ადგილია და აუცილებლად მიგიზიდავთ მოწესრიგებულობითა და სასიამოვნო ჩრდილებით, მით უმეტეს თუ ზაფხულის ცხელი დღე შეარჩიეთ მოგზაურობისთვის.

როგორ მივიდეთ

დედაქალაქიდან სოფელ დაშბაშამდე მანძილი 107 კილომეტრია, მგზავრობას საშუალოდ 2 საათი სჭირდება. ფეხით გასავლელი მანძილი დაშბაშის ჩანჩქერამდე 1.5 კილომეტრია, ორივე გზა - 3 კილომეტრი. საფეხმავლო ბილიკი იწყება სოფელ დაშბაშთან. სხვა სალაშქრო ბილიკებისგან განსხვავებით ამ ბილიკის საწყისი წერტილი უფრო მაღლა მდებარეობს ზღვის დონიდან ვიდრე საბოლოო წერტილი. აქედან გამომდინარე თავიდან მოგიწევთ დაღმართში სიარული, ხოლო უკან დაბრუნებისას აღმართის ამოვლა. სიმაღლეთა სხვაობა დაახლოებით 150 მეტრია. ორივე გზის გავლას, საშუალო დონის მოლაშქრისთვის, 1 - 1.5 სთ სჭირდება. კანიონში გადაადგილებისას მდინარის გადაკვეთა არ გიწევთ, შესაბამისად არ დაგჭირდებათ სპეციალური აღჭურვილობა, თუმცა თუ ფოტოს გადასაღებად კლდის ძირში მისვლას მოისურვებთ, შეიძლება ფეხი დაისველოთ, ამიტომ სასურველია თან იქონიოთ გამოსაცვლელი ფეხსაცმელი, რომელსაც სულაც მანქანაში დატოვებთ და უკან დაბრუნების შემდეგ ჩაიცვამთ.

წალკის კანიონის სამუშაო საათები:

ორშაბათი - კვირა

10:00 - 18:00

დაცულ ტერიტორიაზე შესვლის საფასური:

• კანიონზე შესასვლელი ბილეთის ღირებულება რეზიდენტი პირისთვის - 39 ლარი,
• კანიონზე შესასვლელი ბილეთის ღირებულება არარეზიდენტი პირისთვის - 79 ლარი,
• 3 წლამდე ბავშვები დაიშვებიან უფასოდ

ატრაქციები:

• ბაიკ-ლაინი - 120 ლარი
• გიგანტური საქანელა - 35 ლარიბილეთის შეძენისას გაითვალისწინეთ!

> წალკის კანიონის ბუნების ძეგლის ბილიკზე გასავლელად ვიზიტორის სიმაღლე უნდა აღემატებოდეს 1.20 მ-ს.

> ვიზიტორთა უსაფრთხოების მიზნით, წალკის კანიონის ბილიკი დაკეტილია წვიმის, ძლიერი ნისლისა და თოვლის დროს.

> კანიონში ჩასასვლელი ბილიკის სიგრძე შეადგენს 1.8 კმ

> ბილეთი დაბრუნებას არ ექვემდებარება.

ფასები მოიცავს დღგ-ს!