ატენის წმინდა გიორგის სახელობის ეკლესია

ატენის წმინდა გიორგის სახელობის ეკლესია შიდა ქართლისმხარეში, გორის მუნიციპალიტეტში, სოფელ დიდი ატენის ძველ უბანში მდებარეობს. დარბაზული, ნატეხი და რიყის ქვით ნაშენი ტაძარი XI საუკუნით, 1060-1072 წლებით, თარიღდება. დასავლეთ ფასადის ფრონტონში ჩასმულია ქვა შვიდსტრიქონიანი, ასომთავრული წარწერით, რომლის მიხედვითაც ეკლესია ბაგრატ IV-ის მიერ უნდა იყოს აგებული. ნაგებობას სამხრეთიდან აქვს თაღოვანი შესასვლელი. აფსიდის ღერძზე ერთი სარკმელია, მეორე სარკმელი კი სამხრეთ კედლის აღმოსავლეთ ნაწილშია გაჭრილი. ინტერიერის მხრიდან აფსიდის სარკმლის ორივე მხარეს თითო სწორკუთხა ნიშია, გარე ფასადის მხრიდან კი მას ტუფის ქვის ნახევარწრიული თავსართი და სწორკუთხა არშია აქვს. დარბაზი გადახურულია ცილინდრული კამარით. სატრიუმფო თაღი თაროსებრ კაპიტელებს ეყრდნობა. ეკლესია შელესილი ყოფილა. ნაგებობის ჩრდილო-დასავლეთ კუთხეში შემორჩენილია თავდაპირველი თაროსებრი ლავგარდნის გადანაკეცი, სამხრეთ ფასადზე კი - ორი ლილვითა და წრეთარგით შედგენილი, გვიანდელი ლავგარდანის ფრაგმენტები. ტაძარი საკმაოდ დაზიანებული ყოფილა და უახლოეს წარსულში აღუდგენიათ.

როგორ მივიდეთ

სოფელი ატენი შიდა ქართლის მხარეში, გორის მუნიციპალიტეტში, მდინარე ტანის მარცხენა მხარეს მდებარეობს, გორიდან 10 კმ-ის დაშორებით. სოფელში მიდის სამანქანო გზა.