ბოდორნის სვეტი

ბოდორნის სვეტი მცხეთა-მთიანეთის მხარეში, დუშეთის მუნიციპალიტეტში, სოფელ ბოდორნასთან მდებარეობს, არაგვის ხეობის მარჯვენა მხარეს. იგი ნეოგენურ კონგლომერატში - ბუნებრივად შეცემენტებულ რიყნარში, გამომუშავებულ სვეტს წარმოადგენს. სვეტის სიმაღლე 15 მეტრია, დიამეტრი კი - 4 მეტრი, ზევითკენ უფრო ვიწროვდება. მისი ზედაპირი ბუჩქნარითაა დაფარული. სვეტის ქვედა ნაწილში, აღმოსავლეთ მხარეს, ადრე ქრისტიანული პერიოდის პატარა, ორგანყოფილებიანი გამოქვაბულია გამოკვეთილი. ბოდორნის სვეტის მიმდებარე ფერდობებზე მრავლად გვხვდება ადამიანის მიერ ნაკვეთი გამოქვაბულები. ბუნების ძეგლიდან დაახლოებით 150-200 მეტრის დაშორებით დგას გვიანი შუა საუკუნეების ბოდორნის ღვთისმშობლის სახელობის ეკლესია. ბოდორნის სვეტი და მისი მიმდებარე ძეგლები ძალიან საინტერესო და შთამბეჭდავია, როგორც ბუნების მოყვარულთათვის, ასევე კულტურით დაინტერესებულთათვის. ბუნებისა და ადამიანის ქმნილებების ასეთი ჰარმონიული შერწყმა განსაკუთრებულ ხიბლსა და მრავალფეროვნებას სძენს ამ ადგილს.