ბორჯომის წმინდა ნიკოლოზის ეკლესია

ბორჯომის წმინდა ნიკოლოზის ეკლესია XX საუკუნის ძეგლია. იგი სამცხე-ჯავახეთის მხარეში, ბორჯომის ცენტრში, კოსტავას სახელობის პარკში მდებარეობს. ტაძარი ჯვარ-გუმბათოვანია, მის აღმოსავლეთ მკლავში აფსიდია. შესასვლელი ორია, დასავლეთიდან და სამხრეთიდან. ორივე მათგანს აქვს ხის, მოჩუქურთმებული კარი. დასავლეთის შესასვლელის თავზე მოთავსებულია თაღოვანი სარკმელი და ანგელოზებისა და ე.წ. ბოლნური ჯვრის რელიეფური გამოსახულება. სამხრეთის შესასვლელი რელიეფური მოჩარჩოებითაა გაფორმებული. თითო-თითო სარკმელია განლაგებული ნაგებობის ჩრდილოეთ და სამხრეთ მკლავებზეც, აღმოსავლეთით კი სამი სარკმელია. ეკლესიას რვაწახნაგა გუმბათი აქვს, რომელიც გუმბათქვეშა კვადრატიდან ტრომპებითაა გადაყვანილი. ოთხ წახნაგზე მოთავსებულია თითო სარკმელი, ოთხი კი დეკორირებულია. ნაგებობას აქვს ორსაფეხურიანი ცოკოლი და სადა ლავგარდანი. ფასადებზე მიმობნეულია რელიეფური გამოსახულებები.