ჩაჩუბეთის ღვთისმშობლის სახელობის ეკლესია

ჩაჩუბეთის ღვთისმშობლის სახელობის ეკლესია შიდა ქართლის მხარეში, კასპის მუნიციპალიტეტის სოფელ ჩაჩუბეთში მდებარეობს. იგი დარბაზულ ნაგებობას წარმოადგენს, რომელიც VIII-IX საუკუნეებით თარიღდება. მშენებლობაში გამოყენებულია ნატეხი და თლილი ქვა. ტაძარს სამი მხრიდან სათავსოები აქვს მიშენებული, რომლებიც XVI-XVII საუკუნეებს მიეკუთვნება. სათავსოები ერთმანეთს თაღებით უკავშირდება. ჩრდილოეთის მინაშენი ორნაწილიანია და მის აღმოსავლეთ მონაკვეთში ეკლესიაში შესასვლელი კარია გაჭრილი. სამხრეთის მინაშენი კი სამნაწილიან კარიბჭეს წარმოადგენს. კარიბჭის შუა ნაწილი ყველაზე მაღალია, გვერდითა ნაწილები დაბალი და ცალფერდაა. ეკლესიას სამი შსასვლელი აქვს, სამხრეთით, დასავლეთითა და ჩრდილოეთით. სამხრეთის კედელში ორი სარკმელია, აღმოსავლეთისა და დასავლეთისაში - თითო-თითო. ინტერიერში მოხატულობის მცირე ფრაგმენტები და მლოცველთა ასომთავრული, ნუსხური და მხედრული წარწერებია შემორჩენილი. აღმოსავლეთის ფასადი წრეებში ჩასმული სამი ტოლმკლავა ჯვრის რელიეფებითაა დეკორირებული.