დიდგორის მონუმენტი

დიდგორის მონუმენტი ქვემო ქართლის მხარეში, თეთრიწყაროს მუნიციპალიტეტში მდებარეობს. მემორიალური კომპლექსი, რომელიც მრავალი ელემენტისგან შედგება, საქართველოს ისტორიაში ერთ-ერთ ყველაზე მნიშვნელოვან და ცნობილ ბრძოლას, დიდგორის ბრძოლას, ეძღვნება. 1121 წელს დავით აღმაშენებელმა თურქ-სელჩუკთა მრავალრიცხოვანი ლაშქრის წინააღმდეგ, დიდგორის ველზე გამართულ, ბრძოლაში უდიდესი გამარჯვება მოიპოვა. ამ ბრძოლას ისტორიკოსებმა “ძლევაი საკვირველი” უწოდეს. დიდგორის ბრძოლაში გამარჯვებამ ქვეყნის საბოლოო გათავისუფლება გახადა შესაძლებელი და საქართველოს ისტორიის ოქროს ხანას მისცა დასაბამი. მემორიალს დიდი ტერიტორია უჭირავს. კომპლექსის ცენტრში, მთაზე, მონუმენტი დგას, რომელზეც ბორჯღალია გამოსახული, მის გარშემო კი დიდი ზომის ხმლები, საზეიმო სვეტები, ზარები და სხვა ელემენტებია განლაგებული. გაშლილ სივრცეში აღმართული დიდგორის მონუმენტი თავისი მასშტაბით დიდ შთაბეჭდილებას ახდენს მნახველზე. გარდა თავად ძეგლისა, ამ ადგილიდან შიდა და ქვემო ქართლის ულამაზესი ხედებითაც დატკბებით. დიდგორის ველზე ყოველი წლის 12 აგვისტოს სახალხო ზეიმი, დიდგორობა იმართება ქართველთა დიდი გამარჯვების აღსანიშნავად და მრავალფეროვანი ღონისძიებები ეწყობა. ამ დღეს დიდგორის ბრძოლის მემორიალს უამრავი ადამიანი სტუმრობს მთელი საქართველოდან. დიდგორის მონუმენტთან მიდის სამანქანო გზა.